हामी सबैकाे संसारन्यूज

काठमाडौं । गृहमन्त्री रामबहादुर थापाले भारतले बनाएका बाँधका कारण तराई क्षेत्र डुबानमा परेको बताएका छन् । सोमबार प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा बोल्दै उनले भारतले सीमा क्षेत्रमा सडकरुपी बाँध बनाउँदा तराई डुबेको बताए ।

उनले भारतको त्यस्तो व्यवहार नेपालमाथिको हस्तक्षेप पनि भएको बताए । ‘राजनीतिक रुपमा भन्दा यो भारतले नेपालमा गरेको हस्तक्षेप नै हो’ उनले भने, ‘उनीहरुले आफ्नो हित हेरे, तर नेपालको हितलाई ध्यान दिएनन् ।’

गृहमन्त्री थापाले सीमा क्षेत्रमा बनाएको बाँध र संरचना हटाउन नेपालले गरेको पहल सार्थक नभएको बताए । भारतीय प्रधानमन्त्री नेपाल आउँदा सीमा समस्याको बारेमा सहजीकरण गर्न बनेको कार्यदलले पनि काम गर्न नसकेको उनको भनाई छ । भारतले डुबान रोक्न सहजीकरण गर्नुपर्ने थापाको भनाई छ ।

बाढीपहिरो र डुबान रोक्नका लागि सरकारले नीति तथा योजनाहरु थप बनाउनु पर्ने खाँचो गृहमन्त्री थापाले औंल्याए । कतिपय अवैज्ञानिक विकास नीतिका कारण पनि प्राकृतिक विपत्तिका घटना बढेको उनको भनाई छ ।

गृहमन्त्रीसँगको छलफलपछि राज्य व्यवस्था तथा सुशासन समितिले सीमा क्षेत्रमा भारतद्वारा निर्मित सडक र बाँध तत्काल हटाउन सरकारलाई निर्देशन दिएको छ ।