हामी सबैकाे संसारन्यूज

७ साउन, बाँके । कोरोना महामारीमा निःशुल्क सहयोग गर्नुपर्ने सबै नागरिकको दायित्व भएपनि नरैनापुर गाउँपालिकाले स्वयंसेवीलाई पारिश्रमिक र खाजाभत्तामा २१ लाख रुपैयाँ खर्चेको छ ।

गाउँपालिकाले क्वारेन्टाइन व्यावस्थापनमा खटिएकाहरुका लागि २१ लाख ३५ हजार ६ सय रुपैयाँ पेस्की दिएर पारिश्रामिक बाँडेको हो ।

गाउँपालिका विपत् व्यवस्थापन शाखाले रकम वितरणमाथि प्रश्न उठाउको छ । गाउँपालिकाले सात- सातजनाका दरले १७ वटा क्वारेन्टाइनमा व्यवस्थापन समिति गठन गरेको थियो । त्यसबाहेक एउटा सात सदस्यीय मूल व्यावस्थापन समिति पनि बनेको थियो । उनीहरुको पारिश्रमिक र खाजाभत्ताका लागि गाउँपालिकाबाट मूल व्यवस्थापन समितिमार्फत पेस्की लिएर रकम वितरण गरेको हो ।

मंगलबारसम्म एक सय ४४ मध्ये ८८ जनाले भत्ता बुझिसकेको विहिवारको नयाँ पत्रिका दैनिकमा समाचार छ । क्वारेन्टाइन मूल व्यवस्थापन समितिका संयोजक बृजेन्द्र यादबले एक सय ४४ जनाको २१ लाख ३५ हजार ५ सय रुपैया पेस्की लिएको बताए ।

यादब जयनकिसान माविका विद्यालय व्यवस्थापन समिति अध्यक्ष पनि हुन् । उनले क्वारेन्टाइन व्यवस्थापनका समितिका सदस्यमध्ये हरेक क्वारेन्टाइनमा दुई दुईजनालाई भान्से, सरसफाइकर्मी र सहयोगी तथा एकजनालाई सुपरभाइजरका रुपमा परिचालन गरी पारिश्रमिक वितरण गरेको बताए ।

संयोजक यादवका अनुसार क्वारेनटाइनमा खाना नास्ता पकाउने दुईजनालाई दैनिक आठ सयका दरले र अन्यलाई पाँच सयका दरले पारिश्रमिक वितरण गर्ने निर्णय भएको थियो । यसैबीच गाउँपालिकाका अध्यक्ष इस्तियाक अहमद शाहले खर्च गर्नुपरेकोमा रहर नभएर बाध्यता भएको बताएका छन ।