Sansar News
१५ साउन, काठमाडौँ । दार्चुलाको गुन्ची, कालापानी र लिम्पियाधुरालाई भारतीय क्षेत्र भन्दै त्यहाँ नेपालीको प्रवेश रोक्न पत्राचार गरेको भारतीय प्रशासनलाई नेपालले जवाफ पठाएको छ ।
जिल्ला प्रशासन कार्यलय दार्चुलाले मंगलबार सीमावर्ती दार्चुलाका जिल्ला अधिकारीलाई पत्र लेखेर भारतले दाबी गरेको क्षेत्र नेपालको भएकोले दुःख नदिन भनेको छ ।
गृहमन्त्रालयको निर्देशनपछि दार्चुलाका प्रमुख जिल्ला अधिकारी शरदकुमार पोखरेलले दार्चुलाका जिल्ला अधिकारीलाई जवाफी पत्र लेखेका हुन् । परराष्ट्र मन्त्रालयसँग समन्वय गरी जिप्रका दार्चुलालाई जवाफ लेख्न निर्देशन दिइएको गृह मन्त्रालयका प्रबक्ता केदारनाथ शर्माले बताएको बुधबारको नयाँपत्रिका दैनिकमा समाचार छ ।
पत्रमा भारतले दाबी गरेको भूमि नेपालको भएको प्रस्त भएकाले नेपालीलाई बाधाअड्चन नगर्न भनिएको छ । दार्चुलाका सिडिओ पोखरेलका अनुसार पत्रमा ‘नेपाल र ब्रिटिश इन्डिया कम्पनीबिच सन् १८१६ मा सम्पन्न सुगौली सन्धिको धारा ५ तथा त्यस समयमा प्रकाशित नक्साहरु र एतिहासिक तथ्य-प्रमाणबाट लिम्पियाधुरा, नाबी, कुटी, गुन्जी, लिपुले, कालापानीलगायत क्षेत्र नेपालको भूभाग रहेको कुरा स्पष्ट नै छ । यी नेपाली भुभागहरुमा नेपालीको आवतजावत स्वाभाविक नै रहेको हुँदा त्यसमा कहीकतैबाट बाधा-अड्चन हुनुहुँदैन भन्ने उल्लेख छ ।
वि.सं.२०७७ साउन १४ बुधवार ०९:३३ मा प्रकाशित
