हामी सबैकाे संसारन्यूज

१६ पुस, पोखरा  । व्यवस्थापिका–संसद् विकास समितिका सभापति रवीन्द्र अधिकारीले संविधान कार्यान्वयनको साटो संशोधनको बाटोमा लागेर सरकारले गम्भीर त्रुटि गरेको बताउनुभएको छ ।

नेपाल यातायात स्वतन्त्र मजदुर सङ्गठन लामो दूरी तथा मिनीबस एकाइको १२औँ अधिवेशनको आज यहाँ उद्घाटन गर्दै उहाँले मुलुकलाई विखण्डन गर्ने संविधान संशोधन नेकपा (एमाले)लाई स्वीकार्य नहुने बताउनुभयो ।

यातायात क्षेत्रको समग्र व्यवस्थापनसहित सडक सुरक्षा महत्वपूर्ण भएको भन्दै उहाँले सोका लागि यातायात मजदुर र राज्य बढी उत्तरदायी हुनुपर्नेमा जोड दिनुभयो ।

‘जुझारु, अनुशासित र प्रशिक्षित मजदुर आजको आवश्यकता, दुर्घटना न्यूनीकरण हाम्रो प्रतिबद्धता’ भन्ने नाराका साथ आयोजित सो अधिवेशनले श्याम बजगाईंको अध्यक्षतामा १५ सदस्यीय नयाँ कार्यसमिति गठन गरेको छ ।

सङ्गठनका अध्यक्ष डिलबहादुर तुलाचनको अध्यक्षतामा सम्पन्न अधिवेशनमा पृथ्वी राजमार्ग बस सञ्चालक समितिका महासचिव योगेन्द्रबहादुर केसी, गण्डकी इन्चार्ज विष्णुबहादुर पराजुलीलगायतका वक्ताले यातायात क्षेत्रका समस्या र चुनौतीका बारेमा प्रकाश पार्नुभएको थियो । रासस