हामी सबैकाे संसारन्यूज

काठमाडाैं – राष्ट्रिय किर्तिमानी खेलाडी चन्द्रकला लामादे माथि दलित भएको आधारमा गरिएको कुटपिटलाई राष्ट्रिय खेलकुद परिषदले गम्भिर ध्यानआकर्षण भएको जनाएको छ । आज विहिबार एक विज्ञप्ति जारी गर्दै राष्ट्रिय खेलकुद परिषदका उपाध्यक्ष शिव कोइराला ‘ज्वाला’ ले संविधान प्रदत्त नागरिक हक अधिकार एवं राज्यलाई समेत चुनौती दिने राष्ट्रिय खेलाडी माथि गरिएको व्यवहारले विद्यमान संविधान एवं कानुनलाई नै चुनौती दिएको जनाएका छन् ।

विज्ञप्ति मार्फत उपाध्यक्ष कोइरालाले घटनाका दोषीलाई प्रचलित कानुन बमोजिम हदै सम्मको कारवाही गर्न राज्यका सम्बद्ध निकायलाई आग्रह गरेका छन् । ‘पिडित राष्ट्रिय किर्तिमानी खेलाडीको शिघ्र स्वास्थ्य लाभको कामना गर्दै राष्ट्रिय खेलकुद परिषदबाट आवश्यक सहयोग एवं पहल गर्ने प्रतिवद्धता समेत व्यक्त गर्दछु,’ विज्ञप्तिमा भनिएको छ ।