हामी सबैकाे संसारन्यूज

काठमाडौं । कारोबार दैनिकका पत्रकार तथा कर्मचारीहरुले मंगलबार पनि धर्ना दिएका छन् । तीन वर्ष अघि भएको सम्झौता लागू गर्न र श्रमजीवी पत्रकार ऐनको पूर्ण कार्यान्वयनकाे माग गर्दै उनिहरूले आइतबारदेखि धर्ना सुरु गरेका थिए ।

तीन वर्षअघि भएको सम्झौता कार्यान्वयन नभएको भन्दै पत्रकारहरुले सत्याग्रहसहितको आन्दोलनकाे घोषणा गरेका छन् ।

धर्ना कार्यक्रमलाई सम्बाेधन गर्दै नेपाल पत्रकार महासंघका केन्द्रीय सदस्य जन्मदेव जैसीले मिडिया मालिकहरुलाई श्रमजिविहरुको श्रमको उचित मुल्य दिन माग गरे । कार्यक्रममा बाेल्दै उनले काराेबार दैनिकका मालिक एनआरएनएका पुर्व अध्यक्ष भवन भट्टलाई कर्मचारीहरूकाे श्रम शाेषण गर्ने, दास बनाउने हर्कत बन्द गर्न सुझाए ।

पत्रकार महासंघअन्तर्गतको श्रमजीवी हित प्रवर्द्धन समितिका सह-संयाेजकसमेत रहेका जैसीले विभिन्न मिडिया हाउसमा श्रमजीवीकाे मुद्दालाई लिएर पीडितहरुकाे पक्षमा निरन्तर आन्दाेलनकाे नेतृत्व गर्दै आएका छन् ।

धर्नामा नेपाल प्रेस युनियनका काठमाडौले पनि ऐक्यबद्धता जनाएकाे छ ।

नेपाल पत्रकार महासंघको पूर्व केन्द्रीय सचिव समेत रहेका धर्मेन्द्र कर्णले आमरण अनसन गर्ने घोषणा गरिसकेका छन् । कारोबार पत्रकार तथा कर्मचारी संघका संयोजक समेत रहेका कर्णले विज्ञप्ति जारी गर्दै अमरण अनसनसम्मको आन्दोलन घोषणा गरेका हुन् ।

यस्तै लकडाउनका बेला जर्वजस्ति निकालिएको भन्दै कारोबार दैनिककै पत्रकार विजय देवकोटा श्रम अदालत गइसकेका छन् । उनले आफूलाई नियम विपरित निकालेको भन्दै अदालतमा केहीदिन अघि मुद्धा दर्ता गरेका हुन् ।

लकडाउनका बेला सञ्चारगृहले पत्रकारहरुलाई जर्वजस्ति निकालेपछि नेपाल पत्रकार महासंघले आन्दोलनको घोषणा गरेको थियो । महासंघले घोषणा गरेको आन्दोलनलाई समर्थन र कारोबार दैनिक भित्रका समस्या समाधान गर्न माग गर्दै देवकोटाले नेपाल पत्रकार महासंघ कारोबार प्रष्तिठान शाखाको सचिवको हैसियतले विज्ञप्ति जारी गरेका थिए । तर, विज्ञप्ति जारी गरेपछि व्यवस्थापनले देवकोटालाई बर्खास्ति गरेको थियो ।