Sansar News
काठमाडौं । सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’ छलफलमा जुटेका छन् । स्थायी समिति बैठकबारे एजेण्डा तय गर्न दुई नेता छलफलमा जुटेका हुन् ।
प्रचण्डका प्रेस सहयोगी विष्णु सापकोटा ‘जुगल’ले जानकारी दिएअनुसार दुई नेताबीच बालुवाटारमा छलफल जारी छ । दुई अध्यक्षबीच बिहिबारको लागि बोलाइएको स्थायी समिति बैठकबारे सहमितको प्रस्ताव तयार गर्न छलफल भएको हो ।
पार्टी विवाद समाधान गर्न कार्यदलले दिएको सुझावबारे स्थायी समिति बैठकमा लैजाने प्रस्तावबारे दुई अध्यक्ष छलफलमा जुटेको जुगलले जानकारी दिएका छन् ।
यसअघि कार्यदलले दिएको सुझावबारे सचिवालय बैठकमा पनि छलफल भएको थियो ।
गत असार १० देखि जारी स्थायी समिति बैठक पार्टी विवादका कारण स्थगित छ । विवाद समाधान गर्न कार्यदल गठन गरेसँगै बिहिबारको लागि स्थायी समिति बैठक बोलाइएको छ ।
वि.सं.२०७७ भदौ २४ बुधवार १३:२५ मा प्रकाशित
