हामी सबैकाे संसारन्यूज

काठमाडौं । जनता समाजवादीमा नेता डा. बाबुराम भट्टराईले संविधान सभा र संघीय लोकतान्त्रिक गणतन्त्र माओवादी जनयुद्व र मधेश विद्रोहबाट आएको बताएका छन् । संविधान दिवसको अवसरमा आफ्नो धारणा राख्दै उनले अन्य राजनीतिक दललाई सुसारे, नर्तकी र तमासे भनि टिप्पणी गरेका छन् ।

‘संविधानसभा र संघीय लोकतान्त्रिक गणतन्त्रका वास्तविक जननी माओवादी जनयुद्ध र मधेशविद्रोह हुन्’, भट्टराईले ट्विटरमा लेखेका छन्, ‘अरू धाइ,सुसारे,पण्डा,नर्तकी,तमासे हुन् ।’

भट्टराईले ठूलो त्याग र बलिदानीबाट आएको गणतन्त्र वर्तमान नेतृत्वको हातमा सुरक्षित नरहेको टिप्पणी गरेका छन् । हालका प्रधानमन्त्री केपी शर्मा ओलीप्रति संकेत गर्दै उनले बलयगाडेहरुको हातमा सुरक्षित नभएको बताएका छन् । भर्खरै जन्मिएको अपाङ्ग गणतन्त्र र संघियताको उपचार र रक्षा गर्न भट्टराईको आह्वान छ ।

‘गर्भमै यातना दिएर शिशुलाई अपांग बनाउने बयलगाडेहरूको हातमा यो सुरक्षित छैन, अपांग शिशुको उपचार र रक्षागरौं’ भट्टराईले भनेका छन् ।

पूर्वप्रधानमन्त्रीसमेत रहेका नेता भट्टराईले पछिल्लो समय सत्तारुढ नेकपा र प्रधानमन्त्री केपी शर्मा ओलीप्रति निकै आक्रामक टिप्पणी गर्दै आएका छन् । बेला–बेलामा बाबुराम भट्टराई प्रधानमन्त्री केपी शर्मा ओलीका सल्लाहकारबीच निकै कटाक्षणपूर्णं दोहोरो सामाजिक सञ्जालमा चल्ने गर्दछ ।

संविधान दिवसमा सबैले सम्झनुपर्ने कुरा:१.संविधानसभा र संघीय लोकतान्त्रिक गणतन्त्रका वास्तविक जननी माओवादी जनयुद्ध र मधेशविद्रोह हुन्;अरू धाइ,सुसारे,पण्डा,नर्तकी,तमासे हुन्;२.गर्भमै यातना दिएर शिशुलाई अपांग बनाउने बयलगाडेहरूको हातमा यो सुरक्षित छैन;३.अपांग शिशुको उपचार र रक्षागरौं!

— Baburam Bhattarai (@brb1954) September 18, 2020