हामी सबैकाे संसारन्यूज

१२ असोज, काठमाडौँ । अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी) ले हालै केही विश्वविद्यालयहरुमा भएको उपकुलपति नियुक्ति खारेज गर्न माग गरेको छ ।

प्रेस वक्तव्य जारी गर्दै अखिल क्रान्तिकारीका अध्यक्ष हरिकृष्ण गजुरेलले नेपाल संस्कृत विश्वविद्यालय, कृषि तथा वन विश्वविद्यालय र पोखरा विश्वविद्यालयमा सरकारले दलीय भागवण्डाका आधारमा उपकुलपति नियुक्त गरेकोप्रति विरोध जनाएका छन् ।

यूनियनले विश्वविद्यालयहरुमा उपकुलपतिलगायत पदाधिकारी नियुक्त गर्ने सवालमा प्राज्ञिक व्यक्तिहरुमध्येबाट स्वस्थ प्रतिस्पर्धाको आधारमा नियुक्त गर्नका लागि निरन्तर सरकारसमक्ष अपिल गर्दै आइरहेको स्मरण गराउँदै सरकारलाई उक्त निर्णयलाई अविलम्ब खारेज गर्न आग्रह गरेको छ ।

‘विश्वविद्यालय जस्तो गरिमामाय संस्थामा हुने यी र यस्ता नियुक्तिहरु नगर्नसमेत अपिल गर्दै प्राज्ञिक व्यक्तिहरुबाट स्वस्थ प्रतिस्पर्धाको आधारमा नियुक्त गर्नसमेत जोडदार माग गर्दछौं, विज्ञप्तिमा भनिएको छ । निर्णय नसच्याए सशक्त संघर्षमा उत्रन बाध्य हुने चेतावनीसमेत दिइएको छ ।