हामी सबैकाे संसारन्यूज

काठमाडौं । जब–जब सत्तारुढ नेकपाको आन्तरिक विवाद उत्कर्षमा पुग्छ तब–तब उत्तरी छिमेक सक्रिय भएको देखिन्छ । जसको निरन्तरता हाल पनि छ ।

गत वैशाखमा नेकपा विभाजनको तहसम्म पुगेको बेला उत्तर छिमेकले विवाद समाधानमा भूमिका खेलेको थियो । हाल पनि उत्तर छिमेकको भूमिका उसैगरि सक्रिय बनेको छ ।

बुधबार बोलाइएको सचिवालय बैठक अन्यौंलपूर्णं बन्दै गर्दा एकाएक मध्यरातीकाे समय चिनियाँ राजदूतले प्रधानमन्त्री केपी शर्मा ओलीलाई भेटेर छलफल गरेकी थिइन् । यान्छीको मंगलबार रात गरिएको संवादसँगै बुधबार सचिवालयको बैठक बसेको छ ।

के सुझाब दिएकी थिइन् यान्छीले ?

प्रधानमन्त्री ओली निकट स्रोतका अनुसार मंगलबार रात ९ बजे यान्छी राष्ट्रपति सि चिनफिङको पत्र भन्दै बालुवाटार छिरेकी थिइन् । उनले प्रधानमन्त्रीलाई भेटेर पार्टी विभाजन जसरी पनि रोक्न आग्रह गरेकी थिइन् । स्रोतले उल्लेख गरेअनुसार यान्छीले प्रधानमन्त्री ओलीलाई घुमाउरो पारामा सत्ताबाट निस्किएर भएपनि पार्टी विभाजन रोक्न सुझाएकी थिइन् ।

उनले नेकपा कुनै हालतमा विभाजन हुन नहुने चाहना चिनियाँ कम्युनिष्ट पार्टीको भएको बताएको स्रोत बताउँछ । व्यक्ति फेरिएर केहि हुँदैन् तर पार्टी फुट्ने वा फेरिने गर्नु हुँदैन् भन्ने उनले सुझाब दिएकी थिइन् । छलफलमा यान्छीले नेकपासँग चिनियाँ कम्युनिष्ट पार्टी खुलेर सहकार्य गर्न चाहेको पनि बताएकी थिइन् ।

जनाइएअनुसार उनले अन्य शीर्ष नेतासँग पनि एकै पटक भेट गर्न चाहेकी थिइन् । तर विवाद आउनसक्ने भन्दै यान्छी पछि हटेको बुझिएको छ । तर, उनले चिनियाँ कम्युनिष्ट पार्टीको सन्देश भने सबैलाई पुर्याएको बुझिएको छ ।