हामी सबैकाे संसारन्यूज

काठमाडौं । सत्तारुढ नेकपाभित्र विवाद बढिरहेका बेला पार्टीका कार्यकारी अध्यक्ष पुष्पकमल दाहाल ‘प्रचण्ड’ तथा वरिष्ठ नेता माधवकुमार नेपाल पक्षले विद्यार्थी संगठनको छुट्टै भेला गर्ने भएका छन् । प्रचण्ड–नेपाल पक्षमा विद्यार्थी नेताहरुका अनुसार भेला थापाथली इन्जिनियरिङ कलेज, काठमाडौंमा दिउसो १ बजेदेखि हुने भएको छ ।

भेलालाई प्रचण्ड–नेपाल समुहका नेताहरुले सम्बोधन गर्ने कार्यक्रम रहेको बताइएको छ । जनाइएअनुसार भेलालाई स्थायी कमिटी सदस्य अष्टलक्ष्मी शाक्य, पम्फा भुसाल, केन्द्रीय सदस्य लेखनाथ न्यौपाने, रामकुमारी झाँर्की, ठाकुर गैरेलगायतले सम्बोधन गर्ने कार्यक्रम तय भएको अनेरास्ववियुका सहसंयोजक रञ्जित तामाङले बताए । उनका अनुसार प्रचण्ड–नेपालसहितका नेतासँग छलफलपश्चात भेलाको आयोजना गरिएको हो ।

‘केहि समय अगाडि ऐन जिहरुले सल्लाहसमेत नगरी देश दौहाडा कार्यक्रम गर्नुभयो, उहाँहरुले भेला गर्ने, गुट बनाउने अखिललाई मण्डले कमिटी जस्तो बनाउनु भो, हामी चुप लागेर बस्यौं, विद्यार्थीहरुमा निकै अन्यौंलता भयो’, संसार न्यूजसँगको कुराकानीमा तामाङले भने, ‘हामी विद्यार्थीहरुमा देखिएको अन्यौंलतालाई स्पष्ट पार्न भेला गर्न लागेका हौं ।’

उनका अनुसार उपत्यकाभित्र उपलब्ध विद्यार्थी नेताहरु नै कार्यक्रममा सहभागी हुनेछन् । देशैभरिबाट बोलाउने स्थिति नभएकोले कार्यक्रमबारे जानकारी गराइने उनले जनाए ।