Sansar News
४ पुस, काठमाडौँ । शिक्षा मन्त्रालय र नेपाल टेलिकमको सयकार्यमा देशभरका सामुदायिक विद्यालयमा अध्ययनरत विद्यार्थी, शिक्षक र विद्यार्थीका अभिभावकका लागि नि:शुल्क टेलिफोन र इन्टरनेट सेवा प्रदान गरिने भएको छ ।
उक्त सेवा प्राप्त गर्नको लागि ‘क्लोजर युजर ग्रुप’ बनाउन पर्ने छ । ‘क्लोजर युजर ग्रुप’ भन्नाले पठनपाठनका लागि शिक्षक, विद्यार्थी र अभिभावकहरुलाई जोड्ने माध्यम हो । यसअघि यस किसिमको वैकल्पिक सिकायका कक्षा संचालनमा ल्याउदा न्यूनतम शुल्क लाग्ने गरेकोमा मन्त्रालय र टेलिकमको सहकार्यमा नि:शुल्क टेलिफोन, म्यासेज र इन्टरनेट सेवा उपलब्ध गराउन लागेको हो ।
यसका लागि प्रत्येक कक्षा पिच्छे शिक्षक, विद्यार्थी र अभिभावकको समूह बनाएर नि:शुल्क रुपमा समूहभित्र जतिबेला पनि कुराकानी गर्न , म्यासेज पठाउन सकिने छ । प्रत्यक्ष कक्षा सञ्चालनमा नआउने बेला यो प्रणालीले शिक्षण सिकाइकामा सहजता ल्याउने मन्त्रालयको दाबी छ । ग्रुपमा उपलब्ध गरिएका व्यक्तिहरुका लागि प्रत्येक महिना पाँच जीबी डाटा नि:शुल्क उपलब्ध गराइने छ ।
यो सेवा प्राप्त गर्नको लागि विद्यार्थी, शिक्षक र अभिभावकले विद्यालयमा सम्पर्क गरि स्थानीय तहको सहयोगमा टेलिकमबाट आफ्नो सिमकार्डमा सेवा सुचारु गर्न सकिने छ । सिमकार्ड नभए विद्यार्थी, शिक्षक र अभिभावकका लागि यो योजना अन्तरगतनै नि:शुल्क सिमकार्ड लिने व्यवस्था समेत गरिएको छ ।
वि.सं.२०७७ पुस ४ शनिवार २०:१८ मा प्रकाशित
