Sansar News
१० पुष, काठमाडौँ । नेपाली काँग्रेसको जारी केन्द्रीय समिति बैठक आगामी १९ गतेसम्मका लागि स्थगित भएको छ ।
प्रधानमन्त्री केपी शर्मा ओलीले प्रतिनिधिसभा विघटन गरेपछि उत्पन्न परिस्थितिका विषयमा आधिकारिक धारणा र रणनीति बनाउन बसेको काँग्रेस केन्द्रीय समिति बैठक आगामी १९ गतेसम्मका लागि स्थगित भएको हो ।
बैठक पौष १३ गते १६५ निर्वाचन क्षेत्रमा संसद विघटनका विरुद्धमा हुने प्रदर्शनमा सम्पूर्ण रुपले केन्द्रीत रहने निर्णय गर्ने गरी केही दिनका लागि स्थगित भएको काँग्रेसका मुख्य सचिव कृष्णप्रसाद पौडेलले जानकारी दिए।
अब अर्को बैठक १९ पुसको दिउँसो १ बजे बस्नेछ ।
सरकारको कदमविरुद्ध विरोध कार्यक्रम गर्ने वा नगर्ने भन्ने विवादमै अल्झेको बैठक तेस्रो दिन मात्रै विरोधका कार्यक्रम गर्ने निर्णयमा पुगेको हो ।
यस्तै बैठकले १६ पुसमा राष्ट्रिय एकता तथा मेलमिलाप दिवससमेत देशैभरि विभिन्न कार्यक्रम गरेर मनाउने निर्णय पनि गरेको छ ।
मुख्यसचिव पौडेलका अनुसार शुक्रबारको बैठकमा केन्द्रीय सदस्य ज्ञानेन्द्रबहादुर कार्की, डा. मीनेन्द्र रिजाल, शंकर भण्डारी, देवेन्द्रराज कँडेल, रमेश लेखक, सरिता प्रसाईं र कल्पना चौधरीले धारणा राखेका छन् ।
वि.सं.२०७७ पुस १० शुक्रवार १९:३३ मा प्रकाशित
