हामी सबैकाे संसारन्यूज

२२ पुस, काठमाडौं । प्रधानमन्त्री केपी शर्मा ओलीको सिफारिसमा भएको प्रतिनिधिसभा बिघटनको विरोधमा अनेरास्ववियुले दिउँसै लालटिन बालेर बिरोध जनाएको छ ।

‘दिउँसै लालटिन बाल्यौं हैं, संसद विघटनको धारा खोइ ?’ भन्दै बुधबार माइतीघर मण्डलामा भेला भएर अनेरास्ववियुले राजधानीमा दिउँसै लालिटिन जुलुस निकालेको हो ।

मंगलबारदेखि प्रतिनिधिसभा विघटनको विरुद्ध नौ दिने आन्दोलनका कार्यक्रमहरु सुरु गरेको अनेरास्ववियुले आज दोश्रो दिन राजधानीमा लालटिन बालेर आन्दोलन गरेको हो ।

‘हामी अरु जान्दैनौं संसद विघटन मान्दैनौं, प्रतिगमनकारी मन्त्रीहरु होसियार’ लगायतका नारा लगाउँदै लालटिन जुलुस निकालेका हुन् ।
माइतीघरबाट नाराबाजी गर्दै सुरु भएको उक्त जुलुश बानेश्वरमा पुगेर कोणसभामा परिवर्तन भएको थियो ।

सभालाई सम्बोधन गर्दै अनेरास्ववियुका सहसंयोजक रंजित तामाङले  प्रधानमन्त्रीले गल्ति सच्याउने अवसर र समय रहेको भन्दै समय खट्क्यो भने अहिलेका काम चलाउ मन्त्रीहरु देशभरी नै कुनैपनि कार्यक्रममा जान नपाउने तथा अहिले कालो झण्डाले मात्र स्वागत गरिएकोमा कदम नसच्चिए कुनै पनि मन्त्रीहरुको अनुहार देखाउन नमिल्ने गरी कालोमोसो दलिने चेतावनी समेत दिएका थिए ।

उनले पुष २६ गते प्रधानमन्त्री ओलीलाइ बयलगाडामा राखेर अमेरिका पठाउने भन्दै सम्बोधनका क्रममा आक्रोस पोखेका थिए । ‘अग्रगमन र परिवर्तनको विरुद्धमा प्रतिगमनको पक्षपोषण गरेका केपी ओलीलाई आगामी २६ गते बयलगाडामा राखेर हामी अमेरिका धपाउँदै छौ ।’ नेता तामाङले भने ।

मंगलबार (पुष २१ गतेदेखि सुरु भएको दोश्रो चरणको आन्दोलन पुस २९ गतेसम्म रहनेछ । भने तेश्रो चरणको आन्दोलन पनि माघ १ गते देखि सुरु हुने बताइएको छ ।
पुष २३ गते देशव्यापीरुपमा प्रधानमन्त्रीको पुत्ला दहन गर्ने ।
पुष २४ गते सिडियो कार्यालयमा ज्ञापनपत्र बुझाउने र धर्ना दिने
पुष २५ गते असंबैधानिक कदमविरुद्ध सडकमा बहस गर्ने ।
पुष २६ गते बयलगाडा प्रदर्शन गर्ने ।
पुष २७ गते प्रतिगमनकोविरुद्ध सडक कविता\गीत\गजल कार्यक्रम गर्ने ।
पुष २८ गते सडक नाटक\सडक आर्ट (स्ट्रिट वाल पेन्टिङ) गर्ने तथा पुष २९ गते सडकमा प्ले कार्डसहित कार्टुन प्रदर्शन गर्ने बताइएको छ ।