हामी सबैकाे संसारन्यूज

माघ १५, काठमाडौं । प्रधानमन्त्री केपी शर्मा ओली र चार पूर्वप्रधानन्यायाधीशविरुद्व परेका अदालतको अवहेलनासम्बन्धी मुद्दामा आज सुनुवाई हुने भएको छ । अवहेनासम्बन्धी सबै मुद्दा न्यायाधीश मनोजकुमार शर्माको इजलासमा तोकिएको छ ।

प्रधानमन्त्री ओलीविरुद्व वरिष्ठ अधिवक्ता कुमार शर्मा आचार्य र अधिवक्ता कञ्चनकृष्ण न्यौपानेले रिट निवेदन दर्ता गराएका थिए भने चार पूर्वप्रधानन्यायाधीशविरुद्व अधिवक्ताद्वय लोचन भट्टराई र धनजित बस्नेतले छुट्टाछुट्टै निवेदन दर्ता गराएका थिए ।

प्रधानमन्त्री ओलीले सर्वोच्च अदालतको संवैधानिक इजलासमा विचाराधीन मुद्दामाथि पटक–पटक सार्वजनिक रुपमा टिप्पणी गर्दै आएका छन् । उनले इजलासमा भईरहेको बहसलाई ‘तमासा’ भन्ने गरेका छन् । ओलीले बयोबद्ध वरिष्ठ अधिवक्ता कृष्णप्रसाद भण्डारीलाई पनि सार्वजनिक कार्यक्रमकै बीचमा ‘बाजे वकिललाई सर्वोच्च लगेर तमासा देखाए’ भन्ने टिप्पणी गरेका थिए ।

यता, चार पूर्वन्यायाधीशहरु अनुपराज शर्मा, मिनबहादुर रायमाझी, कल्याण श्रेष्ठ र सुशीला कार्कीले प्रतिनिधि सभा विघटनविरुद्व दर्ता रिटमाथि संवैधानिक इजलासमा बहस चलिरहेको बेला संयुक्त विज्ञप्ती नै निकालेको प्रधानमन्त्री ओलीको कदमप्रति आलोचना गरेका थिए । उनीहरुले ओलीले संविधानले नै नदिएको अधिकार प्रयोग गरेको टिप्पणी गरेका थिए ।