हामी सबैकाे संसारन्यूज

१७ माघ, काठमाडौं । केही दिनयता भारतमा देखिएको बर्ड फ्लु नेपालमा पनि भेटिएको पुष्टि भएको छ । काठमाडौंमा पालिएका पन्छीमा बर्ड फ्लुको संक्रमण भेटिएको पशु सेवा विभागले जनाएको छ ।

विभागले प्रेस विज्ञप्ति जारी गर्दै तारकेश्वर नगरपालिकाको वडा नं. ७ साङ्लेखोला, फुटुङका स्थानीय कृषकहरूले पालेका टर्की र हाँसमा बर्ड फ्लु भेटिएको पुष्टि गरेको हो ।

त्यस क्षेत्रमा पालिएका टर्की र कुखुरा मरेपछि ल्याइएको नमूना केन्द्रीय पशुपन्छी रोग अन्वेषण प्रयोगशालामा रियल टाइम पीसीआर बिधिबाट परीक्षण गर्दा मिति शुक्रबार बर्ड फ्लु रोग पुष्टि भएको हो।

रोग पुष्टि भएको क्षेत्रबाट रोग अन्यत्र फैलन नदिन संघ, प्रदेश तथा स्थानीय तहका पशु सेवासँग सम्बन्धित निकायहरूलाई परिचालन गरी रोग देखिएको क्षेत्रमा रहेका सम्पूर्ण घरपालुवा पन्छी तथा रोग सार्न सक्ने अन्य वस्तुसमेत नष्ट गरिसकिएको विभागले जनाएको छ ।

यस क्रममा १ हजार ८६५ हाँस, ६२२ बट्टाई, ३२ कुखुरा, २५ टर्की, ५४२ अण्डा र ७५ केजी दाना नष्ट गरिएको छ । रोग देखा परेको क्षेत्रलाई पूर्ण निःसंक्रमण समेत गरिएको छ ।

विभागले पन्छी तथा पन्छीजन्य उत्पादनको ओसारपसार गर्दा अनिवार्य रुपमा स्वास्थ्य परीक्षण गरी भेटेरिनरी प्रमाणपत्र लिएर मात्र गर्न गराउन, फार्म परिसरमा जैविक सुरक्षाका विधिहरू अवलम्वन गर्न, सम्पूर्ण पन्क्षीपालकलाई फार्म परिसरमा नियमित रूपमा निःसंक्रमण गर्न तथा व्यक्तिगत सरसफाइमा विशेष ध्यान दिन पनि विभागले कृषकलाई सूचित गरिदिन आग्रह गरेको छ ।

विगत एक महिनाअघि भारतीय सीमा क्षेत्रका विभिन्न राज्यमा बर्ड फ्लु रोग देखा परेको थियो । नेपालमा यो रोगको जोखिम बढेको सन्दर्भमा देशमा रोग भित्रन सक्ने जोखिमलाई मध्यनजर गर्दै रोग रोकथाम तथा नियन्त्रणमा सम्बद्ध सबै निकायलाई सर्तक अवस्थामा राखिएकाे  विभागले जनाएको छ ।