हामी सबैकाे संसारन्यूज

माघ १९, काठमाडौं । बागमती प्रदेशसभाको बैठक बोलाउन माग गर्दै विभाजित नेकपाको प्रचण्ड–नेपाल समुहका सांसदहरुले प्रदेशसभा सचिवालय अगाडि नाराबाजी गरेका छन् । सोमबार तय भएको बैठक विनाकारण स्थगित गरिएपछि सांसदहरुले नाराबाजी गरेका हुन् ।

उनीहरुले संसदलाई बन्धन बनाउने नपाईने भन्दै नाराबाजी गरेका छन् । सांसदहरुले ‘अल्पमतको सरकार राजीनामा दे’, ‘प्रदेश सभा सुचारू गर’, ‘प्रदेश सभा रोक्न पाइँदैन’, ‘अल्पमतको सरकार चाहिँदैन’ लगायतका नारा लगाएका थिए।

प्रदेशसभाको आजको बैठकमा मुख्यमन्त्री डोरमणि पौडेलविरुद्व दर्ता अविश्वासमाथि छलफल गर्ने तयारी थियो । तर, सभामुख सानुकुमार श्रेष्ठले आइतबार राति विनाकारण बैठक फागुन पहिलो सातासम्मको लागि स्थगित गरिदिए ।

१ सय १० सदस्यीय प्रदेशसभामा नेकपाका ८० सांसद रहेका छन् । जसमध्ये ४५ जनाले मुख्यमन्त्री डोरमणि पौडेलविरुद्व अविश्वासको प्रस्ताव दर्ता गरेका छन् ।

प्रचण्ड–नेपाल पक्षका ४५ जना सांसदको हस्ताक्षरसहित गत पुस १० मा अविश्वासको प्रस्ताव दर्ता भएको थियो । गत पुस १० मा दर्ता भएको प्रस्ताव १ महिनापछि मात्रै गत माघ ९ मा प्रदेशसभामा पेस भएको थियो । तर, त्यसपछि भने प्रदेशसभा बैठक स्थगन हुँदै आएको छ ।

सोमबार बोलाईको बैठक अन्तिम समय विनाकारण सभामुखले स्थगित गरिदिएका छन् ।