हामी सबैकाे संसारन्यूज

नेपाली कांग्रेसकी नेतृ जसमति गुुरुङको निधन भएको छ । केहि समय यता बिरामी भई उपचार प्रक्रियामा रहेकी गुुरुङको २०८३ असार २३ गते साँझ ग्राण्डी अस्पताल काठमाण्डौमा निधन भएको हो ।

साविकको होश्रांगङ्दी गाबिसमा जन्मेर गण्डकी प्रदेश पर्वत जिल्लाको पैयँु गाउँपालिका वडा नं. २ त्रिबेणीमा बसोबास गर्दै आएकी जसमति पैयँु गाउँपालिकाको संस्थापक उपाध्यक्ष भएर काम गरेकी थिइन् । लगभग १५ बर्ष अमेरीकामा रहँदा पनि कांग्रेसको सम्पर्कमा काम गरेकी उनी २०७४ को स्थानीय निर्वाचनको केहि समय अगाडी आएर पनि उपाध्यक्षमा चुनाव जितेकी थिइन् ।

उनको निधन पछि पैयुँ गाउँपालिका अध्यक्ष राज मल्ल ठकुरी लगायत विभिन्न तहबाट निर्वाचित जनप्रतिनिधिहरु, पर्वत नेपाली कांग्रेसका अधिकांश कार्यकर्ता, एमाले, नेकपा, रास्वपा, राप्रपा र अन्य दल तथा नागरिक समाज, शिक्षक, बुद्धिजीवी, कर्मचारी, ब्यबशायीले स्वदेश तथा बिदेशबाट भावपूर्ण श्रद्धान्जली ब्यक्त गरेका छन् ।

पंचायतकालमा कांग्रेसको झण्डा उठाएकी र राजनीतिमा महिला सहभागीताको नमुना बनेकी उनी नेपाली कांग्रेसमा महासमिति सदस्य तथा महिला संघको केन्द्रीय सदस्य भएर जिम्मेवारी निर्वाह गरेकी थिईन । उनको निधन पछि सत्य र निष्ठाकी प्रतिमूर्ति, लोकतान्त्रिक बिचारप्रति अटल विश्वास र चट्टानी अडान भएकी, निडर, अध्ययनशील, स्पष्ट निर्णय क्षमता र कार्यान्वयनमा अडिग शाहसी महिला नेतृ लगायत धेरै शब्दावलीमा उनीप्रति श्रद्धा ब्यक्त गरिएको छ ।

विधिको शासन, संस्थागत उत्तरदायित्व, जिम्मेवारी, पारदर्शिता र जवाफदेहिता जस्ता विषयमा उनको स्पष्टता स्मरण भईरहने भन्दै निर्भिकता, निडरता, सत्य र न्यायको बाटोले जसमति संझाईरहने धारणा सार्वजनिक भएका छन् ।