Sansar News
२१ माघ, काठमाडौँ । ट्राफिक नियम उल्लंघनको जरिवाना तिर्न अब बैंकमा लाइन बस्नु नपर्ने भएको छ ।
महानगरीय ट्राफिक प्रहरी महाशाखाले जरिवाना अनलाइनबाटै तिर्न मिल्ने गरी आज(बुधबार) देखि नयाँ सफ्टवेयर कार्यान्वयनमा ल्याउन लागेसँगै लामो लाइनमा बस्नु पर्ने बाध्यता अब हट्ने भएको छ ।
टीभीआरएस (ट्राफिक भायोलेन्स रेकर्ड सिस्टम) मार्फत अनलाइनबाटै जरिवाना तिर्न सकिने यो अनलाइन सेवाको आजै औपचारिक उद्घाटन हुने महानगरीय ट्राफिक प्रहरी महाशाखाका प्रमुख जनक भट्टराईले जनाए ।
सवारी चालकलाई सहज होस् भन्ने उद्देश्यले अनलाइनबाटै जरिमाना रकम भुक्तान गर्ने मिल्ने प्रणाली सुरु गरिएको महाशाखाले जनाएको छ ।
सवारी उल्लंघनको जरिवाना अनलाइनबाटै तिर्न मिल्ने व्यवस्था गरेसँगै सवारीचालकहरुलाई सहज हुने महाशाखाले जनाएको छ । यसअघि ट्राफिक नियम उल्लंघन गरेको जरिवाना तिर्न बैंकमै धाउनुपर्ने अवस्था थियो ।
वि.सं.२०७७ माघ २१ बुधवार १३:४८ मा प्रकाशित
