हामी सबैकाे संसारन्यूज

माघ २८, काठमाडौं । प्रचण्ड–नेपाल नेतृत्वको नेकपाका वरिष्ठ नेता झलनाथ खनालले प्रधानमन्त्री केपी शर्मा ओलीले दुई तिहाई ल्याउँछु भन्ने कुरा असम्भव भएको टिप्पणी गरेका छन् । बुधबार नेकपाले भृकुटीमण्डपमा आयोजना गरेको विरोध सभालाई सम्बोधन गर्दै उनले यस्तो टिप्पणी गरेका हुन् ।

उनले ओलीको दुईतिहाई होइन जमानत जफत हुने बताए । ‘दुई वर्षपछि यो देशमा चुनाव हुन्छ, त्यतिबेला हेर्नुहोला, देशका १६५ सिटमा जमानत जफत हुनेछ, हामी आजै घोषणा गर्न चाहन्छौँ’, उनले भने।

खनालले भँगेराको कथा सुनाउँदै ओलीको भनाई भँगेराको जस्तै भएको टिप्पणी गरे ।

‘नारायणहिटी दरबार अगाडिबाट महेन्द्र शालिकतर्फ फर्केर ओलीले दुईतिहाइ बहुमत ल्याउँछु भने, ओलीले चुनाव गराएर दुईतिहाइ ल्याउने कुरा भंगेराले बाँस नुघाएजस्तै हो,’ खनालले भने, ‘मिस्टर केपी ओली ! तपाईंको खुट्टी हेर्दै पत्याइयो । दुईतिहाइ होइन दुई वर्षपछिको चुनावमा तपाईंको जमानत जफत हुँदैछ, आज हामी यहीबाट घोषणा गर्छौं ।’