हामी सबैकाे संसारन्यूज

१५ बैशाख, काठमाडौं । भारतको दिल्लीबाट ४० वर्षीय पुरुष सोमबार अर्धचेत अवस्थामा कन्चनपुको गड्डाचौकीमा आइपुगे । कोरोना संक्रमणको कारण गम्भीर भएका उनलाई नाकाबाट सोझै महेन्द्रनगरस्थित महाकाली अस्पताल पुर्याइयो ।

आईसीयुमा उपचार भइरहेको उनको प्रश्वास सम्बन्धी समस्या बढ्दै गएपछि सोमबार राति नै मृत्यु भयो । सोमबार गड्डाचौकी नाकामा श्वासप्रश्वासका गम्भीर समस्या भएका दुईै संक्रमित आइपुगेका थिए । उक्त, दिन भित्रिएका ४ सय ४६ मध्ये २ सय ७७ जनाको एन्टिजेन परीक्षण गर्दा ३४ जनामा संक्रमण पुष्टि भएको छ ।

‘मंगलबार पनि तीनजना श्वासप्रश्वासको गम्भीर समस्या भएका संक्रमित भित्रिएका छन्,’ ‘गड्डाचौकीस्थित हेल्थ डेस्कका इन्चार्ज आकाश बारुडीले भने, ‘संक्रमितको संख्या पनि दिन प्रतिदिन बढ्दो छ ।’ उनका अनुसार मंगलबार १ सय ९५ को ऐन्टिजेन परीक्षण गर्दा ३५ जनामा संक्रमण पुष्टि भएको हो । ‘भारतबाट फर्किनेमा संक्रमण बढी देखिन थालेको छ, उनीहरु गम्भीर अवस्थाका समेत आउन थालेका छन्,’ बारुडीले भने, ‘ दिल्लीबाट फर्किने ९० प्रतिशत संक्रमित छन् ।’

गड्डाचौकी नाकामा फागुन २८ देखि हालसम्म ४ हजार ७ सय ७१ जनाको ऐन्जिेन परीक्षण गर्दा ३ सय ६० जनामा संक्रमण पुष्टि भइसकेको पनि बुधबारको कान्तिपुर दैनिकमा समाचार छ ।