हामी सबैकाे संसारन्यूज

काठमाडौं । आगामी आर्थिक वर्ष २०८३/८४ का लागि सातवटै प्रदेश सरकारले आज आफ्नो वार्षिक बजेट सार्वजनिक गर्ने भएका छन्। संवैधानिक व्यवस्था अनुसार असार १ गतेभित्र बजेट ल्याउनुपर्ने प्रावधानअनुरूप प्रदेश सरकारहरू बजेट प्रस्तुत गर्न तयारी अवस्थामा पुगेका हुन्।

प्रदेश सरकारका आर्थिक मामिला तथा योजना मन्त्रीहरूले सम्बन्धित प्रदेश सभा बैठकमा आगामी वर्षको आय–व्ययको अनुमानित विवरण पेश गर्ने कार्यक्रम रहेको छ। बजेट प्रस्तुत गर्नुअघि सबै प्रदेशका नीति तथा कार्यक्रम प्रदेश सभाबाट स्वीकृत भइसकेकाले बजेट कार्यान्वयनको आधार तयार भएको छ।

निर्धारित कार्यतालिकाअनुसार मधेश प्रदेशले सबैभन्दा पहिले दिउँसो १ बजे बजेट सार्वजनिक गर्नेछ भने कर्णाली प्रदेशले दिउँसो ३ बजे बजेट प्रस्तुत गर्ने तयारी गरेको छ। यस्तै, कोशी, बागमती र गण्डकी प्रदेशले दिउँसो ४ बजे बजेट ल्याउने भएका छन्।

लुम्बिनी र सुदूरपश्चिम प्रदेशले भने साँझ ५ बजे प्रदेश सभामा आगामी आर्थिक वर्षको बजेट पेश गर्ने कार्यक्रम तय गरेका छन्। प्रदेश सरकारहरूले विकास निर्माण, सेवा प्रवाह तथा आर्थिक गतिविधिलाई प्राथमिकता दिँदै बजेट ल्याउने अपेक्षा गरिएको छ।