Sansar News
२६ बैशाख, रुपन्देही । रुपन्देहीमा थप ६ जना कोरोना संक्रमितको उपचारका क्रममा मृत्यु भएको छ ।
लुम्बिनी प्रादेशिक अस्पतालका अनुसार मृत्यु हुनेमा तिलोत्तमा नगरपालिका १, ३ र ५ का २ पुरुष र एक महिला रहेका छन् भने बुटवल उपमहानगरपालिका ८, १४ र ३ का तीन महिला रहेका छन् ।
तिलोत्तमा १ रुपन्देहीकी ४५ वर्षीया महिलाको मृत्यु भएको छ । शनिबारै कोरोना पोजेटिभ देखिएपछि अस्पतालको इमरजेन्सीमा उपचार गराइरहेकी उनको आज दिउँसो ३ बजे मृत्यु भएको हो ।
त्यस्तै तिलोत्तमा ३ का ४० वर्षीय पुरुषको पनि उपचारका क्रममा आज दिउँसो १२ः२१ मा मृत्यु भएको छ । शनिबारै कोरोना संक्रमण पुष्टि भएका उनको उपचारका लागि अस्पतालको इमरजेन्सीमा ल्याउँदा ल्याउँदै मृत्यु भएको अस्पतालले जनाएको छ ।
तिलत्तमा ५ का ४८ वर्षीय पुरुषको पनि उपचारका क्रममा मृत्यु भएको छ । बैशाख ११ गते कोरोना पुष्टि भएपछि १२ गतेबाट कोरोना विशेष अस्पतालमा उपचार गराएका उनको शनिबार ११ः४० मा मृत्यु भएको अस्पतालले जनाएको छ ।
त्यस्तै बुटवल ८ की ६५ वर्षीया महिलाको पनि उपचारकै क्रममा आज दिउँसो १२ः२० मा मृत्यु भएको छ । शनिबारै कोरोना संक्रमण पुष्टि भइ अस्पतालको इमरजेन्सीमा उनको मृत्यु भएको अस्पतालले जनाएको छ ।
बुटवल १४ की ५२ वर्षीया महिलाको पनि उपचारका क्रममा आज बिहान ७ः०५ मा मृत्यु भएको छ । बैशाख १५ गतेदेखि अस्पतालमा उपचार गराइरहेकी उनमा बैशाख १३ गते कोरोना संक्रमण पुष्टि भएको थियो ।
त्यस्तै बुटवल ३ की ७४ वर्षीया महिलाको पनि उपचारका क्रममा शनिबार राति मृत्यु भएको छ । उनमा बैशाख २४ गते कोरोना संक्रमण भएको पुष्टि भएको थियो ।
अस्पतालका अनुसार मृत्यु भएका सबैमा ज्वरो र स्वास प्रश्वासमा समस्या रहेको थियो ।
वि.सं.२०७८ वैशाख २६ आइतवार १६:३२ मा प्रकाशित
