हामी सबैकाे संसारन्यूज

वैशाख २९, काठमाडौं । प्रधानमन्त्री केपी शर्मा ओलीलाई सहयोग गर्ने कि नगर्ने भन्ने विषयमा जनता समाजवादी पार्टी (जसपा) विभाजित छ । बहुमत पक्ष ओलीको विकल्प खोज्नुपर्ने लाईनमा उभिएको बेला जसपाको महन्थ ठाकूर समूह भने ओलीलाई नै सहयोग गरेर जानुपर्ने लाईनमा अडिग छ ।

जसपाभित्र देखिएको यस्तो विभाजनले वैकल्पिक सरकार बन्ने कुरामा अन्यौंलता सिर्जना गराएको छ । साथै ओलीकै नेतृत्वमा पुनः सरकार बन्ने सम्भवनाको पनि संकेत गराएको छ ।

प्रधानमन्त्री ओलीले विश्वासको मत प्राप्त नगरेसँगै राष्ट्रपतिले संविधानको धारा ७६ (२) अनुसार सरकार गठनको लागि आव्हान गरेकी थिइन् । तर, अंकगणितमा महत्वपूर्णं मानिएको जसपाको अन्यौंलताको कारण गठबन्धने सरकार नबन्ने त होइन् भन्ने प्रश्न खडा भएको छ ।

जसपा जस्तो अग्रगामी शक्तिले एकताबद्ध ढंगले देशलाई राजनीतिक निकास दिनबाट चुक्नुहुन्न।लोकतान्त्रिक पार्टीमा फरक मत हुनु स्वाभाविक हो।तर हाम्रो आन्तरिक विवादले देशलाई अनिर्णयको बन्दी बनाउनुहुन्न।एकताबद्ध भएर धारा७६(२)को सरकार बनाउन योगदान गरौं! सौताका रिसले पोइको नाक काटे झैं नगरौं!

— Baburam Bhattarai (@brb1954) May 11, 2021

‘सौताको रिसले पोइको नाक नकाटौं’

गठबन्धनको सरकार बन्ने विषयमा देखिएको अन्यौंलताका बीच जसपाका नेता डा. बाबुराम भट्टराईले कित्ता स्पष्ट पार्न जसपाका नेताहरुलाई आग्रह गरेका छन् । उनले वैकल्पिक सरकार राष्ट्रिय आवश्यकता भएको पनि बताएका छन् ।

भट्टराईले जसपाको कारण राष्ट्र नै अनिर्णयको बन्दी बन्नु दुःखद भएको बताए । उनले धारा ७६ (२) अनुसारको वैकल्पि सरकार बनाउन योगदान गर्न नेताहरुलाई आव्हान गरेका छन् ।

नेताहरुलाई उनको भनाई छ, ‘सौताका रिसले पोइको नाक काटे झैं नगरौं ।’