हामी सबैकाे संसारन्यूज

७ जेठ, काठमाडौँ । जुनमा श्रीलंकामा हुने भनिएको २०२१ को एसिया कप स्थगित भएको छ । कोरोना भाइरस महामारीका कारण एसिया कप स्थगित गरिएको श्रीलंका क्रिकेटका चिफ एक्जुकेटिभ अश्ले डे सिल्भाले जानकारी गराएका छन् ।

उनले अहिलेको अवस्थामा जुनमा प्रतियोगिता आयोजना गर्न सम्भव नभएको बताए । डे सिल्भाले एसिया कप अब २०२३ को एकदिवसीय विश्वकप पछि मात्र हुन सक्ने समेत बताएका छन् ।

कोरोनाकै कारण गत वर्ष पाकिस्तानमा हुने भनिएको एसिया कप स्थगित भएको थियो । एसिया कपको पछिल्लो संस्करण सन् २०१८ मा युएईमा भएको थियो । ५० ओभर फर्म्याटमा भएको उक्त प्रतियोगितामा भारतले बंगलादेशलाई पराजित गर्दै उपाधि जितेको थियो ।