हामी सबैकाे संसारन्यूज

जेठ ८, काठमाडौं । नेकपा (एमाले)ले राष्ट्रिय सभा निर्वाचनका उम्मेदवार रामबहादुर थापा ‘बादल’लाई भोट नदिने नेता माधवकुमार नेपाल समूहका १४ प्रदेशसभा सदस्यलाई स्पष्टीकरण सोधेको छ । शनिबार बसेको एमालेको बागमती प्रदेश संसदीय बोर्डको बैठकले बादललाई भोट नहाल्ने नेताहरुलाई स्पष्टीकरण सोध्ने निर्णय गरेको थियो ।

एमालेको प्रदेश संसदीय दलका सचेतक दीपक निरौलाका अनुसार पार्टी विरोधी र संसदीय दल विरोधी गतिविधि गरेकाले स्पष्टीकरण सोधिएको हो । उनका अनुसार एक आइतबार दिउँसोसम्म जवाफ बुझाउने गरि स्पष्टीकरण मागिएको छ ।

निरौलाले बताएअनुसार प्रदेश सभा सदस्य अष्टलक्ष्मी शाक्य, राजेन्द्रप्रसाद पाण्डे, अरुणप्रसाद नेपाल, रचना खड्का, कुसुमकुमार कार्की, मनु सिग्देल, बसुन्धरा हुमागाईं, लक्ष्मण लम्साल, इन्द्रमाया गुरुङ, कृष्णप्रसाद खनाल, वसन्त मानन्धर, शान्तिप्रसाद पौडेल, पार्वती सिलवाल र मीना ज्ञवालीलाई स्पष्टीकरण सोधिएको हो ।

जेठ ६ मा भएको राष्ट्रिय सभा सदस्यको लागि निर्वाचनमा एमाले उम्मेदवार रामबहादुर थापा बादलविरुद्व एमालेकै माधवकुमार नेपाल पक्षका नेता डा. खिमलाल देवकोटा उम्मेदवार बनेका थिए । देवकोटालाई कांग्रेस, माओवादी र जसपाको समर्थन रहेको थियो । एमालेले निर्वाचनमा आफ्ना उम्मेदवारलाई भोट हाल्न ह्वीप जारी गरेको भएपनि माधव पक्षले देवकोटाकै पक्षमा मतदान गरैका थिए ।