हामी सबैकाे संसारन्यूज

८ जेठ, काठमाडौं । नेपाल विद्यार्थी संघ (नेविसंघ) ले सत्ता स्वार्थमा निर्लिप्त ओली -विद्या गठबन्धनलाई परास्त गरी सत्ताच्युत गर्नु आजको राष्ट्रिय आवस्यकता भएको बताएको छ ।

प्रधानमन्त्री र राष्ट्रपतिको मिलेमतोमा मध्यरातमा लोकतन्त्र र संविधानमाथि हमला भएको भन्दै नेविसंघले षडयन्त्रपूर्वक प्रतिनिधिसभा विघटन गर्ने निर्णयको घोर भत्र्सना समेत गरेको छ ।

‘अव लोकतन्त्र र संविधानको रक्षार्थ संघर्षको घडी आएको छ । सत्ताको आयु लम्ब्याउन संबिधानको हरेक धारा छल्दै, समाउँदै बसीरहेका ओली–विद्या गठबन्धनको हरेक गतिबिधिले प्रष्ट पारिसकेको छ कि, उनीहरु सत्तामा टिकीरहन लोकतन्त्र र संविधान समाप्त पार्ने दिशामा अघि बढेका छन्,’ अध्यक्ष राजिव ढुंगानाद्धारा जारी विज्ञप्तिमा भनिएको छ, ‘कथित निर्वाचन गराउनका निम्ति हैन, नगराउनका निम्ति घोषणा गरिएको स्पष्ट छ ।’

नेविसंघले राष्ट्रपति र प्रधानमन्त्रीले गरेको मध्यरातको यस्तो निर्णयले लोकतन्त्र संकटमा परेको र ओली–विद्या सर्वसत्तावाद लाद्न उन्मुख रहेको भन्दै त्यसकाविरुद्ध सम्पूर्ण युवा विद्यार्थीलाई मैदानमा उत्रन समेत आव्हान गरेको छ ।

‘महामारीको मुहुर्तमा ज्ञानेन्द्र शैलीले विदेशी प्रभुले नचाएको संविधान च्यातेर राष्ट्रपति र प्रधानमन्त्रीले थप संकटलाई निम्तो दिएका छन्,’ महामन्त्री दीपक भट्टराई भन्छन्, ‘सम्पूर्ण लोकतन्त्रवादी एकजुट भई संघर्षको बाटोबाट संविधानको संरक्षण र ओलीलाई सत्ताच्युत गर्न अब ढिलो गर्नु हुँदैन ।’