हामी सबैकाे संसारन्यूज

८ जेठ, काठमाडौं । वृहद् नागरिक आन्दोलनका अगुवाहरुले संसद विघटन विरुद्ध एकजुट हुन आव्हान गरेको छ ।

मध्य रातमा प्रधानमन्त्री र राष्ट्रपतिको प्रपञ्चमा गरिएको पछिल्लो संसद विघटन संविधान र लोकतन्त्र नै समाप्त पार्ने कदम चालिएको भन्दै यस्तो कदमलाई नागरिक आन्दोलनले ‘कु दे ता’ ठहर गरेको समेत प्रेस विज्ञप्तिमा जनाएको छ ।

‘हिजो करिब दुई तिहाईको निर्वाचित सरकारको नेतृत्व गर्दा समेत ओलीले सदैव निर्वाचित संस्था, लोकतान्त्रिक राज्य संयन्त्र र संविधानको अवहेलना गरिरहे,’ विज्ञप्तिमा भनिएको छ, ‘महामारीको बीचमा आमजनताले जनउत्तरदायी राजनीति खोजिरहेका बेला उनले मतपत्र थमाउने झुटो घोषणा गर्नु मानवता विरुद्धको अपराध हो ।’ विज्ञप्तिमा भनिएको छ ।

‘यो संकटको क्षणमा आमजनतालाई खोप, भेन्टिलेटर र अक्सिजन चाहिएको छ, मतपत्र होइन । जनताको जीवन रक्षा गर्ने जनस्वास्थ्य प्रणाली र राज्यको स्रोतसाधन सार्वजनिक हित र न्यायको निम्ति चाहिएको छ । शुसासन प्रत्याभुति गर्ने जनउत्तरदायी सरकार चाहिएको छ, महाव्याधिको संकटलाई कूका निम्ति दुरुपयोग गर्ने षडयन्त्र होइन,’ नागरिक आन्दोलनद्धारा जारी विज्ञप्तिमा भनिएको छ,‘ त्यसैले जनस्वास्थ्य, संघीय लोकतान्त्रिक गणतन्त्र एवम् संविधानको रक्षार्थ नागरिक आन्दोलनले आव्हान गरेको निरन्तर संघर्षको औचित्य झनै पुष्टि भएको छ । यस तानाशाहीलाई र कुनैपनि तानशाही प्रवृत्तिलाई परास्त गर्न सबै लोकतान्त्रिक दल, अधिकारकर्मी, पेशाकर्मी एवम् सचेत नागरिकलाई एकजुट भएर सशक्त जनआन्दोलन सिर्जना गर्न हामी आव्हान गर्दछौं ।’