हामी सबैकाे संसारन्यूज

१४ जेठ, काठमाडौँ । जल तथा मौषम विज्ञान विभागले आज शुक्रबार राती ९ बजेपछिको मौषमी अवस्था बारे जानकारी गराएको छ ।

विभागले दिएको जानकारी अनुसार प्रदेश १, २, बागमती, गण्डकी र लुम्बिनी प्रदेशका पहाडी तथा तराईका धेरै जसो भूभागमा निरन्तर बर्षा भैरहेको र थप बर्षा हुने अवस्था देखिएको छ ।

बिशेष गरि प्रदेश १, २, बागमती र लुम्विनी प्रदेशका तराई क्षेत्रमा थप बर्षा हुने सम्भावना देखिएकाले त्यहाँका केहि साना नदिहरुमा आकस्मिक बाढी आउन सक्ने, नदि तटिय क्षेत्र तथा तराईका डुबान हुने होचा स्थानहरुमा उच्च सावधानी अपनाउन अनुरोध गरिएको छ ।

विभागले बंगालको खाडिमा विकास भएको ‘YASS’ सामुद्रिक आँधीको प्रभावले हुने वर्षाको कारण नेपालको पूर्वी भूभागबाट शुरु भई पश्चिमतिर विशेषगरि प्रदेश १, बागमती, गण्डकी, कर्णाली प्रदेशका पहाडी भूभाग भई वहने स–साना नदीहरुमा बहाव बढ्ने, केहिमा सतर्कता तहसम्म पुग्न सक्ने, प्रदेश २ र लुम्विनी प्रदेशका तराई क्षेत्रका केहि साना नदिहरुमा आकस्मिक बाढी समेत आउने सम्भावना रहेकोले २०७८ जेठ १२ गते रातिदेखि जेठ १५ गतेसम्म नदि तटिय क्षेत्र तथा तराईका डुबान हुने होचा स्थानहरुमा उच्च सावधानी अपनाउन हुन यसअघि देखि नै अनुरोध गर्दै आएको छ ।