Sansar News
१५ जेठ, काठमाडौं । नेपाली कांग्रेसका सभापति शेर बहादुर देउवाले राष्ट्रपति र प्रधानमन्त्रीको संस्कार र व्यवहारका कारण देशले दुष्परिणमम भोग्नु परेको बताएका छन् ।
गणतन्त्र दिवसको अवसरमा शुभकामना दिँदै सभापति देउवाले कुनै पनि राज्यको प्रणालीको सफलता नेतृत्व गर्ने शासकको चरित्र र व्यवहारमा निर्भर हुने बताउँदै लोकतान्त्रिक गणतन्त्रको सफलताका लागि हाम्रो शैली र व्यवहार निरन्तर समिक्षाको विषय बन्नु पर्ने बताएका छन् ।
‘देशको राष्ट्रपति र प्रधानमन्त्रीकै संस्कार र व्यवहार तदनुकूलको बन्न नसक्दा त्यसको दुष्परिणाम देशले भोग्नुपर्ने हुन्छ र आज त्यो हामीले भोगिरहेका छौं,’ सभापति देउवाद्धारा जारी शुभकामनामा भनिएको छ, ‘अतः गणतन्त्र दिवसको यो मितिमा यसप्रति गम्भीरता राख्न र यो चुनौती पार गरेर अगाडि बढ्ने संकल्प गर्न म समस्त नेपालीमा अपिल गर्दछु ।’
वि.सं.२०७८ जेठ १५ शनिवार १०:१२ मा प्रकाशित
