हामी सबैकाे संसारन्यूज

२१ जेठ, काठमाडौँ । नेकपा (माओवादी केन्द्र) कोरोना महामारी बिरुद्ध लड्न स्वास्थ्य सामग्री लिएर जिल्ला जिल्ला जाने भएको छ ।

कोरोना महामारी बिरुद्ध लड्न अध्यक्ष प्रचण्डको नेतृत्वमा बनाएको कार्यदलको पार्टी केन्द्रीय कार्यालय पेरिसडांडामा शुक्रबार बसेको बैठकले कोरोना महामारी बिरुद्ध लड्न स्थानीय पार्टी कमिटिहरुलाई परिचालन गर्ने निर्णय गरेको हो ।

पार्टी केन्द्रको पहलमा जम्मा भएका स्वास्थ्य सामाग्रीहरु र पार्टीको प्रबास कमिटीको संयोजनमा बिभिन्न देशका जनप्रगतिशील मञ्चहरुबाट प्राप्त भएका सहयोग सामाग्री एकै साथ बिभिन्न प्रदेशहरुमा पठाइने माओवादी केन्द्रीय सदस्य युवराज चौंलागाईंले बताए । “कार्यदलले आफ्नो काम शुरु गरिसकेको छ । अब केही दिन भित्रै सबै प्रदेश र जिल्लामा स्वास्थ्य सामाग्री पठाइने छ” चौंलागाईंले बताए ।

बैठकले पार्टी केन्द्रको तर्फबाट कोरोना महामारी सम्बन्धी कामको संयोजन गर्नका लागि श्रीराम ढकाल, जोख बहादुर महरा र युवराज चौंलागाईं रहेको एक कार्यदल समेत बनाएको छ ।

यसैबीच, माओवादी केन्द्र प्रबास कमिटिले पांच लाख मूल्य बराबरको स्वाथ्य सामाग्री पार्टीको काभ्रे जिल्ला कमिटिलाई हस्तान्तरण गरेको छ । उक्त सामाग्री काभ्रेको बनेपामा पार्टी केन्द्रीय सदस्य तथा प्रबास समन्वय कमिटिका अध्यक्ष युवराज चौंलागाईंले काभ्रेका माओवादी नेता इन्द्र बहादुर थिंग, प्रदेश सभा सदस्य रत्न ढकाल लगायत नेताहरुलाई हस्तान्तरण गरे ।

अक्सिजन सिलन्डरहरु, एन्टिजेन टेस्ट किटहरु, अक्सिमिटर, पिपिइ सेट, माक्स, ग्लोब्स, सेनिटाइजर, थर्मल गन लगायत स्वास्थ्य सामाग्रीहरु हस्तान्तरण गरिएको नेपाली जनप्रगतिशील मञ्च, पूर्वी एशिया क्षेत्रका सचिव रमेश तिवारीले जानकारी दिए ।

नेकपा(माओवादी केन्द्र) प्रबास कमिटिले एक करोड रुपैंया राशीको कोरोना बिरुद्धको हातेमालो अभियान कोष खडा गरेको छ । उक्त कोषमा हाल सम्म मलेशिया, कोरिया, जापान, साइप्रस, संयुक्त अरब इमिरेट्स, कतार, कुबेत, बहराइन, स्पेन, अष्टेलिया र जर्मनीले सहयोग जम्मा गराइसकेको र अन्य देशहरुले तीब्र रुपमा सहयोग संकलन गरिरहेको बताइएको छ ।