हामी सबैकाे संसारन्यूज

२२ जेठ, काठमाडौं । एमालेका नेता योगेश भट्टराईले देशलाई द्धन्द्धतिर फर्काउने अभिव्यक्तिमा लगाम लगाउन प्रधानमन्त्रीलाई आग्रह गरेका छन् ।

पहिलो र दोस्रो संविधानसभामै असान्दर्भिक भइसकेको बहुराष्ट्रिय राज्यको बहस उपप्रधान तथा शहरी विकास मन्त्री राजेन्द्र महतोले पद बहाली हुँदासाथ पुनः उठाएको भन्दै नेता भट्टराईले यस्तो टिप्पणी गरेका हुन् ।

‘पहिलो र दोश्रो संबिधानसभा मै असान्दर्भिक भैइसकेको बहुराष्ट्रिय राज्यको बहस आज नियुक्त भएका उपप्रधानमन्त्रीले पुनः उठाएछन् । संकेत राम्रो छैन । देशलाई फेरि द्वन्द्वतिर फर्काउने यस्ता अभिब्यक्ति माथि लगाम लगाउनुहोला प्रधानमन्त्रीज्यु,’ सामाजिक संजाल फेसबुकमा नेता भट्टराईले लेखेका छन् ‘संबिधानको धारा ३ ले राष्ट्रको परिभाषा यसरी गरेको छ ‘बहुजातीय, बहुभाषिक, बहुधार्मिक, बहुसांस्कृतिक विशेषता भौगोलिक विविधतामा रहेका समान आकांक्षा र नेपालको राष्ट्रिय स्वतन्त्रता, भौगोलिक अखण्डता, राष्ट्रिय हित तथा समृद्धिप्रति आस्थावान रही एकताको सूत्रमा आबद्ध सबै नेपाली जनता समष्टिमा राष्ट्र हो ।’ अर्थात बिबिधतामा आधारित नेपाली राष्ट्रियता नै हाम्रो साझा राष्ट्रियता हो ।’