Sansar News
२२ जेठ, काठमाडौं । नेकपा एमालेका नेता तथा पूर्वमन्त्री गोकर्ण विष्टले नवनियुक्त उपप्रधानमन्त्री राजेन्द्र महतोको अभिव्यक्ति भौगोलिक अखण्डता र राष्ट्रिय हित प्रतिकुल भएको बताएका छन् ।
नेता विष्टले सामाजिक सञ्जाल फेसबुकमा स्टाटस लेख्दै ‘उपप्रधानमन्त्री राजेन्द्र महतोले ‘बहुल राष्ट्रिय राज्यको स्थापनाको लागि राष्ट्रिय मुक्ति आन्दोलनको तयारी गर्नेू भनी दिएको अभिव्यक्ति भौगोलिक अखण्डता र राष्ट्रिय हित प्रतिकुल भएको’ बताएका हुन् ।
उनले जिम्मेवार पदमा रहेका व्यक्तिबाट यसप्रकारको अराजक र संविधान विरोधी अभिव्यक्ति आउनु दुर्भाग्यपूर्ण भएको उल्लेख गरेका छन् ।
उपप्रधानमन्त्री राजेन्द्र महतोले “बहुल राष्ट्रिय राज्यको स्थापनाको लागि राष्ट्रिय मुक्ति आन्दोलनको तयारी गर्ने” भनी दिएको अभिव्यक्ति भौगोलिक अखण्डता र राष्ट्रिय हित प्रतिकुल छ । जिम्मेवार पदमा रहेका व्यक्तिबाट यसप्रकारको अराजक र संविधान विरोधी अभिव्यक्ति आउनु दुर्भाग्यपूर्ण छ’, नेता विष्टले सञ्जालमा लेखेका छन् ।
जनता समाजवादी पार्टी (जसपा) महन्थ ठाकुर पक्षको नेतृत्व गर्दै शुक्रबार उपप्रधान तथा शहरी विकासमन्त्रीमा नियुक्त भएका राजेन्द्र महतोले पदभार ग्रहण लगत्तै ‘बहुराष्ट्र र बहुराज्य सञ्चालन गर्ने मुक्ति आन्दोलन जारी रहेको’ अभिव्यक्ति दिएका थिए ।
वि.सं.२०७८ जेठ २२ शनिवार १७:१८ मा प्रकाशित
