हामी सबैकाे संसारन्यूज

२३ जेठ, काठमाडौं । भूमिस्धार तथा मालपोत कार्यालय डिल्लीबजारले बालुवाटार स्थित ललिता निवास जग्गा प्रकरणका आरोपि ४९ जनालाई २१ दिनभित्र कार्यालयमा लिखित जवाफ सहित उपस्थित हुन भन्दै सूचना जारी गरेको छ ।

भूमि, व्यवस्था, सहकारी तथा गरिबी निवारण मन्त्रालय अन्तर्गत मालपोत कार्यालय डिल्ली बजारले आइतबारको गोरखापत्रमा सूचना जारी गर्दै २९९ रोपनी सार्वजनिक जग्गा प्रकरणका आरोपिहरुको घर ठेगाना नखुलेको भन्दै २१ दिनभित्र लिखित प्रतिक्रिया सहित आफै उपस्थित हुन आउन भन्दै सूचना जारी गरेको हो ।

‘काठमाण्डौं महानगरपालिका वडा नं ४ बालुवाटारस्थित ललिता निवास क्याम्प क्षेत्र भित्र पर्ने जग्गा तपसिलका संस्था/व्यक्तिहरुको नाममा दर्ता भएको तपसिल बमोजिमको कि.न. क्षेत्रपलका जग्गाहरु यस कार्यालयको २०७७/१२/२० को आदेशानुसार मालपोत ऐन २९४३ को दफा २४ को उपदफा (२) बमोजिम नेपाल सरकारका नाममा कायम गर्नुपर्ने भएकाले तपसिलका संस्था\व्यक्तिहरुलाई म्याद सूचना घरदैलोमा बुझाउन जाँदा ठेगाना पत्ता नलागी म्याद तामेल हुन नसकेको भनि सम्बन्धीत मालपोत कार्यालय तथा तामेल गर्न गएका कर्मचारीबाट फिर्ता प्राप्त भएको हुँदा यो २१ दिने म्याद सूचना जारी गरिएको छ ।’ सूचनामा भनिएको छ ।