हामी सबैकाे संसारन्यूज

जेठ २४, काठमाडौं । नेकपा (एमाले)का अध्यक्ष केपी शर्मा ओलीले पार्टी एकताको लागि भन्दै ६ बुँदे प्रस्ताव अगाडि सारेसँगै विपक्षी गठबन्धनमा फरक खालको तरंग सिर्जना गरेको छ । ओलीको प्रस्तावमा माधव समूहका प्रभावशाली नेताहरु नै सहमत देखिएपछि यस्तो तरंग पैदा भएको हो ।

ओलीको प्रस्तावलाई लिएर सोमबार बिहानैदेखि विपक्षी गठबन्धनका नेताहरु शेरबहादुर देउवा, पुष्पकमल दाहाल ‘प्रचण्ड’ र माधवकुमार नेपालबीच भेटवार्ता भएका थिए । नेताहरुबीच नेता नेपाल निवास कोटेश्वर, देउवा निवास बुढानिलकण्ठमा छुट्टा छुट्टै र समूहगत भेटवार्ता भएका थिए ।

ओलीले अगाडि सारेको ६ बुँदे प्रस्तावमा सर्वोच्च अदालतमा दायर रिटबाट हस्ताक्षर फिर्ता लिनुपर्ने पनि शर्त राखेका छन् । उनको शर्तमा केहि नेताहरुले स्वागत गरेको कारण विपक्षी गठबन्धनमा तरंग सिर्जना भएको हो ।

भेटवार्तामा माधव नेपालले हस्ताक्षर कुनै हालतमा फिर्ता नलिने विश्वास नेताहरुलाई दिलाएको कुरा निकट स्रोतले बताएको छ । बताइएअनुसार नेता नेपालले प्रतिनिधि सभा पुनःस्थापना आफ्नो पहिलो शर्त भएको बताएका छन् ।

यसैबीच माधव समूहले ओलीको प्रस्ताव चालबाजी पूर्णं भएको निष्कर्ष निकालेको छ । माधव समूहको स्थायी समिति बैठकले ओलीको प्रस्ताव झुक्याउन ल्याइएको भन्दै अस्वीकार गर्ने निर्णय गरेको छ ।

साथै समूहले यसअघि अगाडि सारेको ६ बुँदे प्रस्तावलाई समेटेर लिखित वक्तव्य जारी गर्ने निर्णय पपनि गरेको छ । नेता नेपालले गत वैशाख २६ मा पार्टी एकताका लागि भन्दै ६ बुँदे प्रस्तावसहित अध्यक्ष ओलीलाई पत्र पठाएका थिए ।

सम्बन्धित समाचार

नेपाल पक्षको निष्कर्ष : ओलीको प्रस्तावमा इमान्दारीता छैन