हामी सबैकाे संसारन्यूज

२५ जेठ, धनगढी । सुदूरपश्चिम प्रदेशसभाको बैठक सुरु भएको छ । प्रदेशसभा बैठकमा मुख्यमन्त्री त्रिलोचन भट्टले प्रदेशसभामा विश्वासको मत लिनका लागि प्रस्ताव पेश गरेका छन् ।

५२ सदस्यीय प्रदेशसभामा विश्वासको मतका लागि २७ जनाको समर्थन आवश्यक हुन्छ । प्रदेशसभामा मुख्यमन्त्री भट्टको दल नेकपा माओवादी केन्द्रका १३ संसद छन् । नेकपा एमाले सुदुरपश्चिम संसदीय दलको २५ सदस्यीय संसदीय दलमा ओली पक्षका ७ जना मात्र छन् । एमाले माधव पक्षले मतदान गर्ने निर्णय गरेसँगै मुख्यमन्त्री भट्टको पक्षमा स्पष्ट बहुमत बनेको छ । काँग्रेसले पनि आवश्यक पर्दा मत दिने गरी तटस्थ बस्ने निर्णय गरेको छ । प्रदेशसभामा काँग्रेसका १२ सांसद छन् भने जसपाका दुई सांसद छन् ।

एमालेले भट्टलाई विश्वासको मत दिने
नेकपा एमाले सुदूरपश्चिम प्रदेश संसदीय दलले मुख्यमन्त्री त्रिलोचन भट्टलाई विश्वासको मत दिने निर्णय गरेको छ ।
मंगलबार विहान बसेको संसदीय दलको बैठकले मुख्यमन्त्रीको पक्षमा मत दिने निर्णय गरेको हो ।

नेकपा (एमाले) केपी ओली पक्षले भने सुदूरपश्चिम प्रदेश सरकारका मुख्यमन्त्री त्रिलोचन भट्टको विपक्षमा मतदान गर्न भन्दै संसदीय दललाई निर्देशन दिएको थियो ।

एमालेका प्रदेश अध्यक्ष कर्ण थापा र सचिव राजेन्द्र रावलले संसदीय दलका नेता प्रकाशबहादुर शाह र प्रमुख सचेतक दुर्गा विकलाई विपक्षमा मतदान गर्नका लागि ह्विप जारी गर्न निर्देशनसहित पत्र पठाएका थिए ।

सुदूरपश्चिममा एमालेको ओली र नेपाल समूहबीचको विवाद उत्कर्षमा छ । यही जेठ १० गते ओली समूहले माओवादी केन्द्रको नेतृत्वमा रहेको सुदूरपश्चिम प्रदेश सरकारलाई दिएको समर्थन फिर्ता लिने र सरकारमा रहभागी भएका मन्त्रीहरु फिर्ता बोलाउने निर्णय गरेको थियो तर नेपाल समूहले भने प्रदेश संसदीय दलको बैठकले समर्थन कायम राख्ने निर्णय गरेको थियो ।

ओली पक्षले मुख्य मन्त्रीलाई दिएको समर्थन फिर्ता लिने निर्णय गरेसँगै मुख्यमन्त्री भट्टले आज विश्वासको मत लिन लागेका हुन् ।