हामी सबैकाे संसारन्यूज

असार १, काठमाडौं । कर्णाली प्रदेश सरकारले आगामी आर्थिक वर्षको लागि ल्याएको नीति तथा कार्यक्रम बहुमतले पारित भएको छ । मंगलबार बसेको प्रदेशसभा बैठकमा मुख्यमन्त्री महेन्द्रबहादुर शाहीले नीति तथा कार्यक्रम पारित गरियोस् भनी गरेको प्रस्ताव बहुमतले पारित भएको सभामुख राजबहादुर शाहीले प्रदेश सभामा घोषणा गरेका थिए।

योसँगै मुख्यमन्त्री महेन्द्रबहादुर शाही नेतृत्वको सरकारलाई बजेट प्रस्तुत गर्ने बाटो खुलेको छ ।

यामलाल कँडेल फेरि असफल भए

यसअघि विपक्षी एमालेले आफ्ना सांसदहरु विपक्षी रोमा बस्नुपर्ने माग गर्दै संसद अवरुद्ध गर्ने चेतावनी दिएको थियो । साथै एमालेले नीति तथा कार्यक्रमको विपक्षमा मत दिन ह्वीप जारी गरेको थियो ।

तर, एमालेको ह्वीपलाई एमालेकै सांसदहरु मान्न तयार भएनन् । साथै सरकारमा सहभागी मन्त्रीहरु विपक्षीको रोमा बस्न तयार भएनन् । एमालेकै सांसदहरु संसदीय दलको ह्वीप मान्न तयार नभएसँगै संसदीय दलका नेता यामलाल कँडेल संसद सञ्चालन गर्न दिन बाध्य भएका थिए । उनले संवैधानिक बाध्यताका कारण संसद सञ्चालनमा सहयोग गरेको बताएका छन् ।

योसँगै मुख्यमन्त्री महेन्द्रबहादुर शाही नेतृत्वको सरकारलाई बजेट प्रस्तुत गर्ने बाटो खुलेको छ । आज नै बजेट प्रस्तुत गरिँदै छ ।