Sansar News
६ असार, काठमाडौं । नेपाल धितोपत्र बोर्डले सार्वजनिक गरेको ५१ वटा कम्पनीको सूचिका विरुद्ध सर्वोच्च अदालतमा परेको रिटमा अदालतले अन्तरिम आदेश जारी गर्न अस्वीकार गरेको छ ।
अधिवक्ता रविन बोहजुले दर्ता गरेको रिटमाथि आइतबार सुनुवाई गर्दै न्यायाधीश डा. कुमार चुडालले निवेदकको निर्विवाद हकमा असर नपरेको भन्दै अन्तरिम आदेश जारी गर्न नपर्ने आदेश जारी गरेको हो ।
‘निवेदकले अन्तरिम आदेशसमेत जारी गरीपाउँ भनी गरेको निवेदन मागका सम्बन्धमा हेर्दा विपक्षी धितोपत्र बोर्डमा दर्ता रहेका विभिन्न कम्पनीसमेतको विविध आर्थिक अवस्था सर्वसाधारणको जानकारीका लागि प्रकाशन गरेको कार्यले निवेदकको निर्विवाद हकमा असर पारेको भन्ने नदेखिँदा निवेदक मागबमोजिम अन्तरिम आदेश जारी गरिरहन परेन,’ आदेशमा भनिएको छ ।
बोर्डले गत मंगलबार विभिन्न कम्पनीहरुले चलखेल गरेर सेयर मूल्यमा चलखेल भएको भन्दै ५१ वटा कम्पनीको सूची सार्वजनिक गरेको थियो ।
होसियार ! यी ५१ कम्पनीका लगानीकर्ता जोखिममा पर्न सक्छन् (सूची सहित)
वि.सं.२०७८ असार ६ आइतवार २१:१८ मा प्रकाशित
