हामी सबैकाे संसारन्यूज

१० असार, काठमाडौं । प्रधानमन्त्री केपी शर्मा ओलीले बिहिबार मन्त्रीहरुको कार्यभार हेरफेर गरेका छन् ।  प्रधानमन्त्रीले रक्षा र परराष्ट्र मन्त्रालय आफैंसँग राखेका छन् भने अरु मन्त्रालयको जिम्मेवारी चार मन्त्रीमा बाँडेका छन् ।

राष्ट्रपतिको कार्यालयले दिएको जानकारी अनुसार उपप्रधानमन्त्री विष्णु पौडेललाई अर्थ, उद्योग, वाणिज्य तथा आपूर्ति, ऊर्जा, जलस्रोत तथा सिञ्चाइ र गृह मन्त्रालयसहित चार मन्त्रालयकाे जिम्मेवारी दिइएकाे छ ।

त्यस्तै मन्त्री कृष्णगोपाल श्रेष्ठलाई वन तथा वातावरण, युवा तथा खेलकुद, शिक्षा, श्रम रोजगार र स्वास्थ्य मन्त्रालयको जिम्मेवारी दिएका छन् ।
मन्त्री बसन्तकुमार नेम्वाङलाई कृषि तथा पशुपन्छी विकास, खानेपानी, भौतिक पूर्वाधार, सञ्चार तथा सूचना प्रविधि र सहरी विकास मन्त्रालयको जिम्मेवारी दिएका छन् ।

मन्त्री लीलानाथ श्रेष्ठलाई कानुन, न्याय तथा संसदीय मामिला, भूमि व्यवस्था सहकारी तथा गरिबी निवारण, महिला, बालबालिका तथा ज्येष्ठ नागरिक, संस्कृति पर्यटन तथा नागरिक उड्डयन र संघीय मामिला तथा सामान्य प्रशासन मन्त्रालयको जिम्मेवारी दिएका छन् ।

प्रधानमन्त्री ओलीले प्रतिनिधिसभा विघटनपछि गरेको मन्त्रिपरिषद विस्तारलाई सर्वोच्च अदालतले बदर गरिदिएसँगै अहिले उनीसँग आफू चारमन्त्री मात्र छन् ।

जेठ ७ गते संसद विघटन गरेपछि उनले दुईपटक मन्त्री परीषद् विस्तार गरी २५ सदस्यीय बनाएका थिए । तर सर्वोच्च अदालतले सोमबार प्रतिनिधिसभा विघटनपछि नियुक्त भएका मन्त्रीलाई कामकाज गर्न रोक लगाएपछि प्रधानमन्त्री ओलीसँग आफूसहित ५ सदस्यीय मन्त्रिपरिषद सदस्य रहेका छन् ।

कुन मन्त्रीलाई के जिम्मेवारी थप भयो त ?