हामी सबैकाे संसारन्यूज

१३ असार, काठमाडौं । स्वास्थ्य तथा जनसंख्या मन्त्रालयले कोरोना संक्रमण पुष्टि भएको १० दिनसम्म अस्पताल जाने लक्षण नदेखिएमा पुनः कोरोना परीक्षण गर्नु नपर्ने बताएको छ ।

केही सरकार, गैह्रसरकारी तथा निजी कार्यालयहरुको ‘कोरोना परीक्षणको नेगेटिभ रिर्पोट’ अनिवार्य गरिएको भन्ने गुनासो आइरहेका बेला त्यस्तो नर्गन/नगराउन मन्त्रालयले अनुरोध गरेको छ ।

‘कोरोना संक्रमण पुष्टि भएको १० दिनसम्म पनि अस्पताल जानुपर्ने लक्षण नदेखिएमा, त्यस अबधिमा आइसोलेसनमा बसेको, कसैसँग हेलमेल नभएको र स्वास्थ्य मापदण्डको पूर्ण पालना गरेको अवस्थामा अरुमा कोरोना सर्ने कुनैपनि सम्भावना नहुने भएकाले परीक्षण गर्नुपर्ने कुनै बैज्ञानिक आधार छैन,’ मन्त्रालयद्धारा जारी सूचनामा भनिएको छ, ‘यदि १० दिनपछि पनि कोभिड–१९ का लक्षण देखिएको खण्डमा लक्षण देखिन छोडेको थप ३ दिनसम्म मात्र आइसोलेशनमा बस्नुपर्दछ ।’