Sansar News
१५ असार काठमाडौँ । नेकपा (माओवादी केन्द्र)ले कारबाही गरेका मेयरहरूलाई काम गर्न दिन सर्वोच्च अदालतले अन्तरिम आदेश दिएको छ ।
सर्वोच्चले माओवादी केन्द्र बाट निर्वाचित भइ दल त्याग गरेर नेकपा (एमाले) प्रवेश गरेका दुई मेयरलाई तत्कालका लागि काममा रोक नलगाउन अन्तरिम आदेश दिएको हो ।
निर्वाचित भएको दल माओवादी त्याग गरी एमाले प्रवेश गरेका रौतहटको मौलापुर नगरपालिकाकी मेयर रीनाकुमारी साह र कटहरिया नगरपालिकाका मेयर सियाराम कुशवाहलाई कामकाज गर्न दिनका लागि भन्दै सर्वोच्च अदातलले अन्तरिम आदेश दिएको हो ।
न्यायाधीश कुमार चुडालको एकल इजलासले मंगलबार साह र कुशवाहाको रिट निवेदनमाथि सुनुवाइ गर्दै उक्त आदेश दिएको हो ।
प्रस्तुत विवादमा काुननको गम्भीर व्याख्या निहित रहेको, निवेदकहरूले राजीनामा नदिएको, अर्को दलको सदस्यता नलिएको तथा अर्को दल गठन गरेको यकिन अवस्था नदेखिएको भन्दै उनीहरूलाई मेयरका रूपमा काम गर्नबाट रोक नलगाउन अन्तरिम आदेशमा भनिएको छ ।
सर्वोच्चले मुद्दाको अन्तिम किनारा नलागेसम्म माओवादीले गरेको निर्णय, निर्वाचन आयोगको निर्णय र पत्राचार कार्यान्वयन नगर्न भनेको छ ।
११ असार निर्वाचन आयोगले माओवादी केन्द्रबाट २०७४ को स्थानीय तहमा निर्वाचित ३ पालिका प्रमुख, ६ उपप्रमुख, १ नगर कार्यपालिका सदस्य, ४ जना वडाध्यक्ष नेकपा एमाले प्रवेश गरेको भन्दै पदमुक्त गरेको थियो ।
वि.सं.२०७८ असार १५ मंगलवार २२:०२ मा प्रकाशित
