हामी सबैकाे संसारन्यूज

१७ असार, काठमाडौँ । नेकपा (एमाले)को संस्थापन पक्षले बोलाएको केन्द्रीय कमिटी बैठकमा वरिष्ठ नेता झलनाथ खनाल –माधवकुमार नेपाल पक्ष सहभागी नहुने भएको छ ।

बिहीबार सो समूहको बुद्धनगरमा बसेको बैठकले शुक्रबार बोलाइएको केन्द्रीय समिति बैठकमा यथास्थितिमा नजाने सर्वसम्मत निर्णय गरेको उपाध्यक्ष भीमबहादुर रावलले जानकारी दिए ।

एमालेको संस्थापन पक्षले महाधिवेशन आयोजक कमिटी भङ्ग गरी शुक्रबारका लागि केन्द्रीय कमिटी बैठक बोलाएको छ । पार्टीलाई २०७५ जेठ २ अगाडिको अवस्थामा फर्काउनुपर्ने माग गर्दै आएको समूहले अहिलेको स्थितिमा बैठकमा सहभागी हुन नसकिने निष्कर्ष निकालेको हो ।

एमाले अध्यक्ष केपी शर्मा ओलीले बिहिबार १० औँ अधिवेशन आयोजक कमिटी भंग गरी केन्द्रीय समिति व्युँताएका थिए । उक्त कमिटीमा पूर्व माओवादीका रामबहादुर थापा बादल सहित २० जनालाई समेटिएको छ । त्यसमा माधव समूहले असहमति जनाउँदै आएको छ ।