Sansar News
१८ असार, काठमाडौँ । राष्ट्रिय सभाका सांसद रामनाथ विडारीले सरकारले सर्वोच्च अदालतलाई हेप्न लागेको बताएका छन् ।
बिहिबार सरकारले सर्वाेच्च अदालतको आदेशलाई अटेरी गर्दै नागरिकता सम्बन्धी (पहिलो संशोधन) अध्यादेश राष्ट्रियसभामा पेस गरेपछि सांसद बिडारीले यस्तो अभिव्यक्ति दिएका हुन ।
सर्वाेच्च अदालतको आदेशविपरीत नागरिकता अध्यादेश पेस गर्नु अदालतको अवहेलना भएको बताउँदै उनले भने ‘सरकारले जनतालाई र सदनलाई हेप्यो, अब अदालतलाई पनि हेप्न लागेको छ ।’
अदालतको संवैधानिक इजलासले नागरिकतासम्बन्धी अध्यादेश कार्यान्वयन नगर्न र यथास्थितिमा राख्न अन्तरिम आदेश दिए पनि सरकारले अटेरी गर्दै राष्ट्रियसभामा पेस गरेको हो । राष्ट्रियसभाको बिहीबारको बैठकमा सरकारले १६ वटा अध्यादेश पेस गरेको थियो । तीमध्ये एउटा नेपाल नागरिकता (पहिलो संशोधन) अध्यादेश पनि छ ।
अध्यादेशमा जन्मसिद्ध नागरिकका सन्तानलाई आमाबाबु दुवै नेपाली नागरिक भए वंशजका आधारमा नागरिकता दिन मिल्ने व्यवस्था राखिएको छ भने बाबुको पहिचान नभएका सन्तानलाई आमाका नामबाट वंशजका आधारमा नागरिकता दिइने प्रावधान पनि समेटिएको छ ।
वि.सं.२०७८ असार १८ शुक्रवार ०९:२६ मा प्रकाशित
