Sansar News
१८ असार, ओमान । नेपाली दूतावास ओमानले, ओमानमा कोरोना भाइरस संक्रमित हुनेको संख्या बढ्दै गइरहेको भन्दै त्यहाँ कार्यरत नेपालीलाई सजग हुन अनुरोध गरेको छ ।
ओमानमा कोरोना भाइरसको अनुगमन/मुल्याङ्कन गरिरहेको ओमानको सर्वोच्च कमिटीको पछिल्लो निर्णयानुसार अर्को निर्णय नहुन्जेलसम्मका लागि रात्रीकालीन लकडाउन लागु गरिएको छ ।
ओमानको स्वास्थ्य मन्त्रालयले निकाल्ने दैनिक विवरण अनुसार ओमानमा कोभिड–१९ को संक्रमणदर व्यापकरूपमा बढ्दै गएको पाइएको बताउँदै ओमानमा संक्रमणका कारण हालसम्म ५ जना नेपालीहरूले ज्यान गुमाएको र केही उपचाररत रहेको पनि दूतावासले जनाएको छ ।
‘अतः नेपाली दूतावास ओमान यहाँ रहनुहुने नेपाली दाजुभाई तथा दिदिबहिनीहरूलाई ओमानको सर्वोच्च समितिको निर्णयहरूको पूर्ण पालना गर्नुहुन अपिल गर्दछ । साथै कोभिड–१९ को जोखिमबाट बच्न पर्याप्त मात्रामा सामाजिक दुरी कायम गर्न एवम् रोकथामका सम्पूर्ण उपायहरू अवलम्बन गर्न समेत अनुरोध गर्दछ ।’ विज्ञप्तिमा भनिएको छ ।
दूतावासले ओमानमा खोप लगाउने कार्यक्रम जारी रहेकोले आ–आफ्नो कम्पनी/स्पोन्सरमार्फत् खोप लगाउनु समेत अनुरोध गरेको छ ।
अनिवार्य ७ दिन क्वारेन्टिनमा बस्नुपर्ने
त्यस्तै नेपाल लगायत विदेशबाट ओमान आउँदा यात्रुहरूले अनिवार्यरूपमा संस्थागत रूपमा उक्त कमिटिले तोकेका होटलहरूमा ७ दिन क्वारेन्टिन बस्नुपर्ने नियम पनि यथावत राखिएकोले सादै तारासुद (Tarassud +) एपमार्फत आफ्नो विवरण भरी ओमान अवतरण भएपश्चात् एअरपोर्टमै पिसिआर परीक्षण गर्नुपर्ने व्यवस्था अनिवार्य गरिएको पनि दूतावासले जानकारी दिएको छ ।
दूतावासले यस सम्बन्धमा थप केही बुझ्न परेमा कार्यालय समयमा दूतावासको सम्पर्क नं २४६९६१७७÷२४६९६८८३ र अन्य समयमा दूतावासको हटलाईन नं ७१५९२४९० मा सम्पर्क गर्न समेत अनुरोध गरेको छ ।
वि.सं.२०७८ असार १८ शुक्रवार १४:२४ मा प्रकाशित
