हामी सबैकाे संसारन्यूज

असार १८, काठमाडौं । नेकपा (एमाले)को माधवकुमार नेपाल पक्षले पार्टी अध्यक्ष केपी शर्मा ओली पार्टी एकतामा नरहेको निष्कर्ष निकालेको छ । सर्वोच्चमा दायर रिटमा गरिएको हस्ताक्षर फिर्ता लिन समय सीमा तोकेसँगै माधव पक्षले यस्तो निष्कर्ष निकालेको हो ।

शुक्रबार बसेको केन्द्रीय समिति बैठकमा पार्टी अध्यक्ष ओलीले हस्ताक्षर फिर्ता लिन २ दिनको समय सीमा दिएका थिए । उनले समय सीमाभित्र हस्ताक्षर फिर्ता नलिए माधव पक्ष एकतामा नरहेको स्पष्ट हुने चेतावनी दिएका थिए ।

ओलीले दिएको समयसीमा प्रति माधव पक्षले भने एकता विरोधी अभिव्यक्ति भन्ने टिप्पणी गरेको छ । माधव पक्षका एक स्थायी समिति सदस्यले ओली पूर्णं एकता विरोधी रहेको स्पष्ट भएको बताए ।

‘एउटा त बैठक अवैधानिक छ, अबैधानिक बैठकबाट यो निर्णय हुनु र निर्देशन हुनु नौलो कुरा भएन’, उनले भने, ‘तर, यो एकता विरोधी शैली हो, यसबाट ओली थप एकता विरोधी रहेछन् भन्ने पुष्टी भयो ।’

उनका अनुसार ओलीसँग संवादको सम्भावना टर्दै गएको छ । माधव पक्षले यसबारे बैठक नै बसेर औपचारिक धारणा सार्वजनिक गर्ने उनले बताएका छन् ।