हामी सबैकाे संसारन्यूज

१८ असार, काठमाडौँ । जनता समाजवादी पार्टीको तर्फबाट लुम्बिनी प्रदेश सरकारमा सहभागी भएकी राज्यमन्त्री सुमन शर्मा रायमाझीले पदबाट राजीनामा दिएकी छन् ।

मन्त्री रायमाझीले शुक्रबार पदबाट राजीनामा दिँदै मुख्यमन्त्री शंकर पोखरलेलाई दिएको समर्थनसमेत फिर्ता लिएको जनाएकी छन् ।
राज्यमन्त्री शर्माले समाजवादी पार्टीले एमाले नेतृत्वको सरकारलाई सहयोग नगर्ने नीति लिएकाले आफू सरकारमा बसेर कामलाई निरन्तरता दिन नसक्ने उल्लेख गर्दै संविधानको धारा १६९ को उपदफा २ (क) अनुसार राजीनामा दिएको जनाएकी छन् ।

उनी वैशाख ६ गते नेकपा एमालेका मुख्यमन्त्री शंकर पोखरेल नेतृत्वको सरकारमा सहभागी भै भौतिक पूर्वाधार विकास राज्यमन्त्री नियुक्त भएकी थिइन् ।

उनले पार्टीले आफूमाथि गरेको कारवाही फुकुवा गर्न आग्रह गर्दै अध्यक्ष उपेन्द्र यादवलाई पत्रसमेत लेखेकी छन् ।

प्रधानमन्त्री केपी शमौ ओलिको कदमलाई लिएर विभाजित बनेको जसपाको रायमाझी सहितका ४ सांसदले पार्टी निर्णय विपरित गएर सरकारको अविश्वासको प्रस्तावको विपक्षमा मतदान गरेका थिए ।

जसपाका ६ सदस्यमध्ये शर्माको राजीनामा पछि जसपाका ३ प्रदेश सभा सदस्य सरकारको समर्थनमा र ३ विपक्षमा देखिएका छन् । शर्माको राजीनामासँगै मुख्यमन्त्री शंकर पोखरेल नेतृत्वको सरकार पुन: अल्पमतमा परेको छ ।