हामी सबैकाे संसारन्यूज

( १ )
आधा बाटो हिडे पछि बल्ल भेट भयो हाम्रो
जिउडाल त ठिकै लाग्यो बोली रहेछ चाम्रो
हतारमा सम्बन्ध गाँसेर पश्चात्ताप मान्नुभन्दा,
भेटघाट नगरी जतिसक्दो टाढै बसेको राम्रो ।
( २ )
जनता रोग र भोकले मरिरहँदा हाँसी रहनुपर्ने
बडाले जातीय विभेदको माला गाँसी रहनुपर्ने
कस्तो खालको लोकतन्त्र हुर्किदै छ यो देशमा,
चर्को विरोध हुँदा पनि कुर्सीमा टाँसी रहनुपर्ने ।
( ३ )
कहिले यता त कहिले उता गरेका छन्
जता ठूलो भाग मिल्छ उतै सरेका छन्
आफ्नै स्वार्थको पछाडि दौड्ने नेताले,
लोकतन्त्रको भ्रम जनतामा छरेका छन् ।
( ४ )
गरीबका पीडा नाप्न नसकिने गहिरा हुन्छन्
बर्खा याममा दुःख दिने बाढी र पहिरा हुन्छन्
अप्ठ्यारो पर्दा जतिसुकै हारगुहार मागे पनि,
ढुङ्गाको मन भएका मान्छेहरू बहिरा हुन्छन् ।
( ५ )
बादल पारिको देशमा सहर हुन्छ कि हुन्न माया
मेरा दुःख देख्दा तिम्रो मुटु छुन्छ कि छुन्न माया
जिन्दगीमा एकपछि अर्को गर्दै पीडा दिई रहयौं
मैले छलकपट गरे त्यो मन रुन्छ कि रुन्न माया ।