हामी सबैकाे संसारन्यूज

काठमाडौं । जनसांस्कृतिक महासङ्घ नेपालको ऐतिहासिक एकताको राष्ट्रिय सम्मेलन भव्यतापूर्वक सम्पन्न भएको छ ।

तीनकुनेको मन्डला ब्याङ्कवेट तीनकुनेमा सम्मेलनले सांस्कृतिककर्मी तथा कवि भीम कुमाखीलाई संयोजक र अष्ट लामालाई सहसंयोजकमा चयन गर्दै ५१ सदस्यीय कार्यालय टिम, सचिवालय, केन्द्रीय समिति र ४५ सदस्यीय प्राज्ञिक परामर्श समिति गठन गरेको छ ।

प्रमुख अतिथि नेपाली कम्युनिस्ट पार्टीका सहसंयोजक माधवकुमार नेपालले पानसमा बत्ती बालेर कार्यक्रमको समुद्घाटन गरेका थिए ।

प्रमुख अतिथि नेपालले नेपाली कम्युनिस्ट आन्दोलन अहिले रक्षात्मक जस्तो देखिए पनि नयाँ उत्साहका साथ अघि बढ्दै देश र जनताको पक्षमा काम गर्ने बताएका थिए । उनले कम्युनिस्टहरू आमूल परिवर्तनका संवाहक भएकोमा जोड दिँदै आन्दोलनभित्र देखा परेका अराजकता र कमजोरीबाट सचेत र सजग रहनुपर्ने विचार व्यक्त गरे । उनले पार्टी र सङ्गठन प्रति नयाँ पुस्तालाई विचारको आन्दोलनमा लाग्न र जिम्मेवार बनाउनुपर्नेमा जोड दिए ।

विशिष्ट अतिथि कला, साहित्य तथा संस्कृति विभाग केन्द्रीय कार्य संयोजन समितिका सदस्य गङ्गानारायण श्रेष्ठले कम्युनिस्ट आन्दोलन, विश्व समाजवादी संस्कृति र नेपाली समाजवादी संस्कृति अहिले रक्षात्मक अवस्थामा पुगेको बताउँदै त्यसलाई प्रभावकारी र आक्रमक दिशातर्फ अघि बढाउनु पर्नेमा जोड दिए । उनले कला, साहित्य र संस्कृति सामाजिक परिवर्तनको महत्त्वपूर्ण माध्यम भएको बताए ।

सम्मेलनमा महासङ्घका इन्चार्ज चिरन पुनले विधान तथा प्रतिबद्धतापत्र प्रस्तुत गर्दै अबको प्रगतिशील सांस्कृतिक अभियान चारैतिर धारिलो ’चौमुखे’ तरवार जस्तै भएर उठ्नुपर्ने बताए । महासङ्घका सहइन्चार्ज उदय श्रेष्ठले स्वागत मनतव्यका क्रममा प्रगतिशील सांस्कृतिक आन्दोलनको ऐतिहासिक पक्षको चित्रण गर्दै टुटफुटबाट भन्दा पनि एकताबाट नै प्रगतिशील सांस्कृतिक आन्दोलनलाई उचाइमा पुर्याउन सकिने बताए ।

सम्मेलनमा जनसांस्कृतिक महासङ्घका पूर्व इन्चार्ज डा. गोपाल ठाकुर, नेकपा जनवर्गीय सङ्गठन समन्वय मोर्चाका उपप्रमुख बलराम बाँस्कोटा, जनसांस्कृतिक महासङ्घका पूर्व अध्यक्ष मातृकाप्रसाद पोखरेल आदिले शुभकामना मन्तव्य प्रस्तुत गरेका थिए ।

नवनिर्वाचित महासङ्घका संयोजक भीम कुमाखीले लेखक र कलाकारहरूको एकता प्रकृयालाई सार्थक बनाउँदै प्रगतिशील सांस्कृतिक आन्दोलनलाई नयाँ उचाइमा पुर्याउने प्रतिबद्धता व्यक्त गरे । सम्मेलनले कला, साहित्य र संस्कृतिको माध्यमबाट समाज रूपान्तरणको अभियानलाई थप उचाइमा पु¥याउने प्रतिबद्धता व्यक्त गर्दै आगामी कार्यदिशा तय गरेको छ ।

सम्मेलनमा कलाकारहरू उदय श्रेष्ठ, झङ्कार बुढा, कर्ण विद्रोही, धनु ज्ञयामी, दीपक राई, एलिना, डम्बर रोकाया, पुजा श्रेष्ठलगायतले गीत प्रस्तुत गरेका थिए भने कवि राजाराम राउतले कविता सुनाए ।
जनसांस्कृतिक महासङ्घका कार्यालय सदस्य कुस्मा महरा ’प्रगति’ले कार्यक्रम सञ्चालन गरेकी थिइन् ।