हामी सबैकाे संसारन्यूज

२१ असार, काठमाडौँ । सरकारले प्रशासन र प्राविधिक तर्फका दुई वरिष्ठ सहसचिवलाई सचिवमा बढुवा गरेको छ भने तीन जना सचिवको सरुवा गरेको छ ।

सोमबार प्रधानमन्त्री निवास बालुवाटारमा बसेको मन्त्रिपरिषद् नियमित बैठकले वरिष्ठ सहसचिवद्वय मधुसूदन बुर्लाकोटी र सुशीलचन्द्र तिवारीलाई सचिवमा बढुवा गरेको हो ।

लोक सेवा आयोगका अध्यक्ष माधव प्रसाद रेग्मीको अध्यक्षतामा आइतबार सिंहदरवारमा बसेको बढुवा सिफारिस समितिको बैठकले सिफारिस गरे अनु्सार रोलक्रममा रहेका बुर्लाकोटी र तिवारीलाई सचिवमा बढुवा गरेको हो ।

बढुवा सिफारिस समितिको बैठकले प्रशासनतर्फ सहसचिव मधुसूदन बुर्लाकोटी, कृष्णहरि पुष्कर र खगेन्द्रप्रसाद नेपालको सिफारिस गरेको भने प्राविधिकतर्फ सुशील चन्द तिवारी, गोपालप्रसाद सिग्देल र राजेन्द्रप्रसाद खनालको नाम सिफारिस गरेको थियो ।

बुर्लाकोटीलाई सुदूरपश्चिम प्रदेशको प्रमुख सचिव र सुशील चन्द्र तिवारीलाई राष्ट्रिय पुनर्निर्माण प्राधिकरणमा पदस्थापन गरिएको छ । बुर्लाकोटी प्रशासन सेवाका हुन् भने तिवारी प्राविधिक तर्फका हुन् ।

त्यस्तै मन्त्रीपरिषद्को बैठकले तीन सचिवको सरुवा गरेको छ । यसरी सरुवा हुने सचिवमा तोया ज्ञवाली, रामकृष्ण सुवेदी र सुरेश आचार्य रहेका छन् ।

प्रधानमन्त्री तथा मन्त्रिपरिषद्को कार्यालयका सचिव तोया ज्ञवालीलाई राष्ट्रपति कार्यालयमा सरुवा गरिएको छ । सुदूर पश्चिम प्रदेश प्रमुख सचिव रामकृष्ण सुवेदीलाई उपराष्ट्रपतिको कार्यालयमा सुरेश आचार्यलाई शिक्षा, विज्ञान तथा प्रविधि मन्त्रालयमा सरुवा गरिएको हो ।

आजैको मन्त्रिपरिषद् बैठकले प्रशासन र प्राविधिक तर्फ दुई जना सचिवमा बढुवा गर्ने निर्णय गरेको छ ।