Sansar News
असार २९, काठमाडौं । सभापति शेरबहादुर देउवा नेतृत्वमा सरकार बन्ने तयारी भएसँगै कांग्रेसमा बेग्लै व्यस्तता सुरु भएको छ ।
मन्त्रिमण्डलका क–कसलाई समावेश गराउने भनि नेताहरु पक्षगत रुपमै छलफलमा जुटेका छन् । कांग्रेसभित्र गुटगत रुपमै आ–आफ्ना मान्छेलाई पार्न छलफल चल्न थालेको छ ।
आफुँ निकटका नेतालाई मन्त्री बनाउन शेरबहादुर देउवा छुट्टै छलफलमा जुटिरहेको बेला वरिष्ठ नेता रामचन्द्र पौडेल, नेता कृष्णप्रसाद सिटौला पनि फरक–फरक छलफलमा जुटेका छन् ।
सिटौला पक्षले मन्त्री छनौट गर्नको लागि दिउँसो १ बजेदेखि बैठक बोलाएको छ । बताइएअनुसार चन्डोलस्थित सिटौला निवासमा मन्त्री छनोट गर्न बैठक बस्दैछ ।
यता रामचन्द्र पौडेल पनि आफुँ निकटस्थसँग छलफलमा जुटेका छन् । पौडेल निवास बोहोराटारमा मन्त्री छान्ने विषयमा मंगलबार बिहानैदेखि छलफल चलिरहेको छ ।
सर्वोच्चको फैसला आएसँगै मंगलबारदेखि नै सभापति देउवा निवास बुढानिलकण्ठमा नेताहरुको भीड लागेको छ । सानो आकारको मन्त्रिमण्डलको तयारी गरिरहेका बेला आफुँ र आफ्नो पक्षलाई पार्न नेताहरु दौडधुपमा छन् ।
मंगलबार बिहानदेखि नै देउवाले उपसभापति विमलेन्द्र निधि, महामन्त्री पूर्णंंबहादुर खड्का, बालकृष्ण खाँडलगायतसँग छलफल गरिरहेका छन् ।
वि.सं.२०७८ असार २९ मंगलवार १३:०३ मा प्रकाशित
